Nxënësit e shkollave të mesme të Prishtinës organiyuan sot një protest para Teatrit Kombëtar duke kërkuar drejtësi për vrasjen e bashkëmoshatarit të tyre, Aulon Zeka.
Ata kanë marshuar edhe deri te hyrja e Kuvendit të Kosovës, ku kanë bërë thirrje “Drejtësi për Aulonin”.
Shoqja e ngushtë e Aulonit, Eliesa Aliu, ka shprehur pakënaqësi me gjendjen e sigurisë në vend, pasi autoritetet për siguri nuk ndërmarrin masa adekuate për të parandaluar raste të ngjashme.
“Është bërë e vështirë të jetosh në Kosovë, njëherë ishte Astriti e tani Auloni, e nesër dikush tjetër. Ka ardhur koha që, sikur të mos e kesh një familjar në pozita të larta, siç po i cilësojnë këta drejtorët, biznesmenët, deputetët, policët, atëherë ti nuk je kurrkush”, tha ajo.
Ndërsa, shoqja tjetër e Aulonit, Ardiana Canolli, e cila nuk mund të ndalte lotët, lexoi poezinë që e kishte shkruar për shokun e saj të ndjerë, Aulonin.
“Aulon, i mblodha forcat për të shkruar për ty, dije që secili prej neve është mërzitur. Ti ke shkuar vëlla, e di nuk kthehesh më, ama vështirë këtij fakti ne me i dal në ballë. Asnjëherë nuk dite të krijoje probleme, pse bash ty vëlla Zoti të mori prej neve? Ah, bre Guxim, pse vëllain ma more, a hiç nuk t’u dhimbtë ajo fytyre engjëllore? Ke shumë herët ai prej neve me u largua, a ia vlen për një femër shokun me tradhtua. Fli i qetë vëlla atje lartë, se Zoti mat dashurit i mban ngat”, citoi ajo.
Aulon Zeka është gjetur i vrarë të shtunën afër shkollës “Model” në Prishtinë, ndërsa si të dyshuar janë arrestuar një 16-vjeçar dhe një 15-vjeçare. Gjykata atyre ua ka caktuar nga një muaj paraburgim. /tesheshi.com/
