Vrasësi i tre kurdëve në Paris u tha hetuesve se motivi i tij ishte urrejtja ndaj të huajve, tha sot prokurorja publike e Parisit Laure Beccuau, raporton Reuters.
Vrasësi 69-vjeçar, i njohur më parë për policinë, deklaroi gjatë seancës se grabitja e shtëpisë së tij në vitin 2016 shkaktoi një ortek urrejtjeje ndaj të huajve tek ai që u bë patologjike.
“Ai e përshkroi veten si një person të dëshpëruar me mendime vetëvrasëse dhe pretendoi se e kishte ruajtur plumbin e fundit për vetëvrasje pas krimit”, shtoi Beccuau.
Vrasjet u kryen më 23 dhjetor në lagjen e dhjetë të Parisit, pranë qendrës kulturore kurde Ahmet Kaya dhe në dyqanet kurde aty pranë. Një grua dhe dy burra kanë mbetur të vdekur, ndërsa tre persona të plagosur lehtë po marrin trajtim spitalor.
Qendra Kulturore Ahmet Kaya është vendi i takimit të Qendrës Demokratike të Kurdëve në Francë (CDKF), dega kryesore e lëvizjes nacionaliste kurde dhe përfaqësuesi ligjor i Partisë së Punëtorëve të Kurdistanit (PKK), një organizatë në luftë me shteti turk.
Vrasja shkaktoi trazira në komunitetin kurd të Francës, me mijëra njerëz në të gjithë vendin që u mblodhën në mbështetje të kurdëve dje. Në një tubim në Paris, një grup protestuesish u përleshën me policinë, e cila u përgjigj me gaz lotsjellës, sipas agjencive. /tesheshi.com/
