Fadil Kasemi, 53-vjeçari, i cili 3 ditë më parë vrau ish-bashkëshorten e tij, gjyqtaren Fildes Hafizi, 39 vjeç, ka dalë sot para gjykatës për t´u njohur me masën e sigurisë.
53-vjeçari është lënë në burg pa afat, ndërsa nuk ka folur para trupit gjykues. Duket se ai ka mbajtur të njëjtin qëndrim sikundër para oficerëve të policisë, duke mos dhënë sqarime mbi krimin.
Ngjarja e rëndë ndodhi teksa 39-vjeçarja, nënë e dy fëmijëve, po hipte në automjetin e saj poshtë banesës ku jetonte, në lagjen e njohur si “Xhamlliku” në Tiranë.
Ish-bashkëshorti, i liruar nga burgu pak muaj më parë si përfitues i amnistisë së fundvitit, ju afrua në makinë me armë në dorë dhe qëlloi ndaj saj duke e lënë të vdekur me një plumb në kokë.
Ai ende nuk është shprehur para hetuesve për rrethanat e ngjarjes, dhe nuk ka pranuar avokatë.
Pas krimit të rëndë, 53-vjeçari me pistoletë në dorë i ka dalë përpara një furgoni dhe nën kërcënimin e armës i ka kërkuar shoferit që ta largonte nga vendi i ngjarjes.
Prokuroria ka ngritur 3 akuza ndaj autorit të krimit: armëmbajtje pa leje, vrasje në rrethana cilësuese dhe rrëmbim. /tesheshi.com/
