Nga Mensur Krasniqi
Zgjedhjet e 11 dhjetorit në Maqedoni kërcënohen nga listat me votues fiktivë, që është dhe plaga me e madhe e tyre për t’u konsideruar të shëndetshme politikisht, ku në përfundim palët, sidomos ato humbëse të heshtin duke iu bindur vullntetit të sovranit. Pavarësisht Marrëveshjes së Përzhinos, nënshkruese e së cilës ishin katër partitë më të mëdha politike në Maqedoni, VMRO, LSDM, BDI dhe PDSH, e ku u ra dakort për pastrimin e tyre, pra për fshirjen e votuesve të dyshimtë, kjo ende nuk është realizuar deri tani. Tesheshi.com ofron si “provë materiale” një dokument mbi figurimin e votuesve fiktivë në listat e KSHZ-së në lagjen Serovë të komunës Çair të Shkupit.
Ka qenë zotëri Bekir Tusha ai që nga kjo lagje ka njoftuar portalin tesheshi.com se në adresën ku jeton ai mbi 40 vite (Serovë, nr.99) sipas listës së KSHZ-së figurojnë se jetojnë mbi 20 persona tërësisht të panjohur, si për të e po ashtu edhe për fqinjët e tij. Madje sipas Bekir Tushës, nuk është vetëm adresa e tij që nxjerrë votues të dyshimtë, por gjatë kontrollit të listës së KZHZ-së edhe në adresën e fqinjit (Serovë, 98) del një tjetër masë votuesish të panjohur.
“Nuk e kuptoj si është e mundur që në adresën time të jetojnë mbi 20 persona krejtësisht të panjohur. Unë hyra në faqen e KSHZ-së të kontrolloj mos vallë na kanë fshirë nga lista e votuesve, por u shtanga kur e pashë se më dolën një grumbull njerëzish të cilët as nuk jetojnë as që kanë jetuar ndonjëherë në shtëpinë time, po edhe si fqinjë të mi. Në këtë shtëpi jetoj mbi 40 vjet, dhe asnjëherë nuk ka ndodhur një gjë e tillë. Përveç meje, edhe në shtëpinë e fqinjit tim figurojnë një numër i lartë i votuesve të dyshimtë. Nuk e di nëse bëhet fjalë për ndonjë lëshim teknik ose hapësirë për manipulim me votat”, tha tërë habi 52-vjeçari Bekir Tusha.
Me këtë, sipas ekspertit juridik Mersim Maksuti, Maqedonia edhe njëherë po dëshmon se nuk ka kapacitet të garantojë zgjedhje të lira dhe demokratike. Dhe nuk përjashtohet aspak mundësia që mospastrimi i votuesve të dyshimtë, në fund t’ju shërbejë partive në pushtet për të manipuluar vullnetin e zgjedhësve që të mbajnë me çdo kusht pushtetin.
“Përkundër dakordimit të katër subjekteve politike se janë plotësuar kushtet për mbajtjen e zgjedhjeve dhe pastrimit të listës zgjedhore, ekzistimi më tej i një numri të madh fiktiv të votuesve është një dëshmi tjetër se ky pushtet po i shfrytëzon dhe i vë në lëvizje të gjitha makinacionet zgjedhore për një fitore me çdo kusht në zgjedhje duke cenuar drejtëpërdrejtë legjitimitetin e këtyre zgjedhjeve dhe shfaqjen edhe njëherë e imazhit të këtij vendi si i paaftë deri në fund të garantoj një proces të rregullt zgjedhor!”, deklaroi Mersim Maksuti për portalin tesheshi.com.
Ndryshe, sipas një teorie të profesorit universitar Izet Zeqiri, përmes një formule të bazuar në të dhëna statistikore është arritur në përfundimin se në Maqedoni dalin 280 mijë votues fiktiv dhe jo 40 mijë ashtu siç kishin konstatuar partitë politike.
“Nëse në Maqedoni janë të regjistruar 2.050.000 banorë, 550 mijë janë nën 18 vjeç pa të drejtë vote. Ateherë 2.050.000 banorë minus 550.000 nën 18 vjeç del se janë 1.500.000 votues. Kjo tregon se duhet te kishte kaq votues e jo 1.780.128 votues, që i bie se mbi 280 mijë votues të jenë fiktiv, e jo 40 mijë”, ka thënë profesori universitar Zeqiri.
Kështu, klimën elektorale, por dhe vetë procesin zgjedhor, rrezikojnë ta cenojnë këto fakte që bijnë era manipulim. /tesheshi.com/
