Të rinjtë e PD do të organizojnë protesta kundër zgjedhjes së Gramoz Ruçit në krye të Kuvendit dhe Fatmir Xhafajt si ministër i Brendshëm. Kjo u pohua nga kryetari i FRPD-së, Belind Këlliçi, i cili i drejtoi një apel opozitës që të ndërmarrë një aksion për të penguar marrjen e detyrës nga Ruçi dhe Xhafaj.
Madje, nuk përjashtohet mundësia e një aksioni barrikadë për të penguar Kuvendin të votojë dy emrat e lartpërmendur në postet drejtuese të dy institucioneve mjaft të rëndësishme.
Shkaku sipas të rinjve demokratë është lidhja e Ruçit dhe Xhafajt me kohën e diktaturës.
“Qershia mbi tortë’ ishte emërimi, jo vetëm i Gramoz Ruçit, por edhe i Fatmir Xhafajt, prokurorit dhe hetuesit të periudhës së diktaturës, në pozicionin e Ministrit të Brendshëm. Forumi Rinor i Partisë Demokratike nuk mund të pajtohet dhe nuk do të pajtohet me këtë vendim. Ju do të shihni dhe aksionin që do të realizohet në kuadër të mosbindjes qytetare ndaj këtij vendimi provokator, të turpshëm dhe të panevojshëm në këtë moment për gjithë Shqipërinë. Çdo qytetar shqiptar duhet të dalë për të protestuar, për veten e tyre dhe të ardhmen”, tha Këlliçi për “Channel One”.
Sipas tij, nëse ata zgjidhen në postet respektive ku janë propozuar, do të kontrollojnë mbi 50 % të pushtetit në Shqipëri.
“Kujtojmë se përveç faktit që sot kemi të bëjmë me një qeveri që përbëhet nga 11 ministra me portofol, por nga ana tjetër kemi dy superministra që kontrollojnë thuajse gjysmën e qeverisë, tërësisht për nevoja të kontrollit personal dhe të ushtrimit të presionit mbi qeverinë, për të thelluar më tej korrupsionin”, tha ai. /tesheshi.com/
