Presidenti, kryeministri, kryekuvendari dhe liderët e partive politike kanë kryer obligimin e tyre qytetarë, me ç’rast u kanë bërë thirrje qytetarëve të shfrytëzojnë të drejtën e tyre dhe të dalin në mënyrë sa më masive në votime.
Presidenti Hashim Thaçi, nga qendra e votimit uroi qytetarët e vendit për këtë ditë, që sipas tij, është shumë e veçantë dhe e rëndësishme.
Thaçi ftoi qytetarët që të dalin dhe të votojnë në këtë proces të rëndësishëm zgjedhor për qeverisjen lokale.
Presidenti i vendit tha se beson që të gjithë mekanizmi politik, shoqëria civile, vëzhguesit, mediat do të jenë në krye të detyrës dhe përgjegjësive në mënyrë që edhe ky test i demokracisë të përmbyllet suksesshëm.
Kryeministri e njëherit kreu i AAK-së Ramush Haradinaj, i cili votoi në Shkollën e Mjekësisë “Ali Sokoli” në kryeqytet, po ashtu u bëri thirrje qytetarëve me votë të vendosin vet për fatin e tyre.
“Ftoj të gjithë qytetarët e vendit që të dalin e të votojnë. Kosovën e presin shumë punë, një pjesë e punëve të rëndësishme ndodhin në komuna. Janë me rëndësi komunat, kryetarët e komunave, asambletë komunale dhe vetëm me punë mund të shkojmë kah zhvillimi, kah rritja e gjithëmbarshme e vendit dhe kjo rritje kërkon edhe rolin aktiv të qytetarit, pra votën e qytetarit. Prandaj, votoni të gjithë. Me fat” tha kryeministri.
Kryetari i Kuvendit e njëherit kreu i PDK-së Kadri Veseli, pas votimit tha se sot duhet të gjithë të ndihen krenar ku kemi arritur si demokraci, me një proces të qetë zgjedhor.
Ai ftoi të gjithë qytetarët ta shfrytëzojnë të drejtën e votës dhe të fitojë ai që është më i miri.
“Ta përfundojmë qetë dhe të shkojë në fund vullneti i qytetarëve”, tha Veseli, duke ftuar qytetarët të dalin në votime dhe të vendosin për të ardhmen e tyre.
Kryetari i Lëvizjes Vetëvendosjes, Visar Ymeri, pasi votoi tha se qytetarët duhet të votojnë në mënyrë masive, në mënyrë që vota të jetë sa më cilësore.
“Është jashtëzakonisht e rëndësishme që qytetarët e Republikës, secili nëpër komunat e veta, sot ta shfrytëzojnë këtë të drejtë që e kanë, sa më masivisht, në mënyrë që edhe vullneti i tyre dhe zëri i tyre të shndërrohet në qeverisje e mirëqeverisje për komunat ku jetojnë. Është jashtëzakonisht e rëndësishme që dalja të jetë sa më masive, në mënyrë që vota të jetë sa më cilësore”, tha Ymeri.
Kryetari i LDK-së, Isa Mustafa pas kryerjes së obligimit qytetar tha se sot është një ditë shumë e rëndësishme për zgjedhjen e përfaqësuesve lokalë.
Ai tha se është në vullnetin e qytetarëve që me verdiktin e tyre t’i ndihmojnë demokratizimit dhe zhvillimit të vendit.
“Uroj që gjithë qytetarët të dalin të votojnë, për ata që qytetarët mendojnë se e meritojnë votën e tyre”, tha Mustafa.
Kreu i NISMA-s, Fatmir Limaj, pasi shfrytëzoji të drejtën e tij për të votuar tha se shpreson që fitues të jenë ata që do të merren me problemin e qytetarëve.
“Shpresoj dhe besoj që qytetarët e Kosovës do të marrin vendimin e duhur të zgjedhin njerëzit të cilët do të jenë zëri i tyre në nivel lokal. Uroj që të kemi drejtues njerëzit të cilët do të merren me zgjidhjen e problemeve të qytetarëve. Sot një ditë e mirë një mundësi e madhe për të gjithë qytetarët e Republikës për të vendosur kush do t’i rejtoj e përfaqësoj në të gjitha asambletë anekënd republikës. Shpresoj dhe besoj që kjo ditë të përfundoj ashtu siç ka nisur”, tha Limaj.
Kryetari i AKR-së, Behgjet Pacolli, i cili votoi në shkollën “Shkëndija” në Hajvali, pas votimit ka thënë se sot është dita e rinis dhe e ardhmërisë së tyre.
“Edhe sot një ditë e rëndësishme. Është dashur dhe do duhej t’i dedikohej rinisë. I ftoj të gjithë të dalin dhe të botojnë për një të ardhme më të mirë të votojnë për perspektivën tonë”, tha Pacolli.
Kryetarja e Alternativa-s, Mimoza Kusari Lila, që votoi në shkollën “Yll Morina” në Gjakovë, tha se është me rëndësi që cdo qytetarë të ushtroj të drejtën e votës së lirë dhe të ndjehet pjesë e zgjedhjes për Komunën e Gjakovës.
“Konsideroj se gjithë fushata dhe gjithë procesi deri me tani ka shkuar në mënyrë të rregullt dhe të qetë. Po shpresoj që cdo qytetar do ta shfrytëzoj të drejtën e votës, edhe pse ende mbetet brengë në vete mos pastrimi i listave, gjë kjo që krijon hapësirë për keqpërdorime, por kam besimin që komisionerët dhe gjithë të tjerët që janë të involvuar në këtë proces do jenë të përgjegjshëm në detyrë konform edhe përgjegjësisë ligjore”, tha Kusari Lila.
Kandidati i pavarur për kryetar të Komunës së Skenderajt, Bekim Jashari, pasardhës i familjes Jashari nga Prekazi ka votuar në një nga qendrat e votimit në këtë komunë.
Jashari pas votimit ka ftuar qytetarët të dalin dhe të votojnë sipas dëshirës dhe vullnetit të tyre,.
“I përshendes të gjithë qytetarë e Skenderajit dhe gjithë Kosovës. Të dalin të votojnë pa dallime gjine dhe të votojnë sipas dëshirës. E rëndësishme është me shfrytëzu të drejtën e votimit. Urojë të na prijë e mbara”, ka thënë Jashari.
Përgatiti: Blendi Gashi – tesheshi.com
