Kreu i partisë Demokratike të Kosovës e ka kapur keq me deputetët e tij që kundërshtojnë themelimin e Gjykatës Speciale. Mes argumenteve të përdorur prej tij në takimet intensive që ka pasur me deputetët për t’i bindur të votojnë pro, janë edhe llogaritë partiake.
“Nëse e doni fundin e PDK-së mos e votoni Gjykatën Speciale. Si me Gjykatë, si pa Gjykatë, në momentin që ne nuk jemi në pushtet, do të jemi cak i aktakuzave të pushteteve që vijnë”, citon gazeta Blic fjalët e Hashim Thaçit.
Gazeta iu referohet burimeve që thonë se Thaçi ka argumentuar se nëse deputetët nuk votojnë Specialen, do të dëmtohet e gjithë PDK-ja.
“Nëse nuk votohet Gjykata Speciale, vendi shkon në zgjedhje dhe krejt faji në sy të ndërkombëtarëve është tek PDK dhe ne si parti e humbim primatin e partisë më të madhe në vend. LDK po shihet në pozitë më favorizuese tek ndërkombëtarët për shkak të unitetit që ka brenda saj për shkak të Gjykatës Speciale”, citohet të ketë thënë Thaçi. /tesheshi.com/
