Votimi i MSA-së në Kuvendin e Kosovës, të gjithë kundër opozitës: nuk duhej ta lëshonte sallën

Nga Blendi Gashi

Presidenca, Qeveria, Bashkimi Evropian, analistë e gazetarë kanë përshëndetur miratimin e MSA-së nga Kuvendi.

Mirëpo, drejtues të institucioneve shtetërore dhe njohës të rrethanave politike e vlerësojnë të gabuar lëshimin e sallës nga opozita, disa prej të cilëve e quajnë veprim nihilist.

Deklarata e Jahjagës:

Sot u bashkuam, pavarësisht dallimeve tona e orientimit tonë politik, të përgjegjshëm për peshën historike të këtij momenti. E hodhëm bashkërisht këtë hap jetik për qytetarët e Republikës së Kosovës, për forcimin e perspektivës evropiane të shtetit tonë dhe nisëm rrugën e pakthyeshme për ta bërë Kosovën anëtare të Bashkimit Evropian.

Ky rrugëtim vazhdon të jetë plot sakrifica dhe ne duhet të jemi të vëmendshëm për listën e gjatë të prioriteteve që na presin për ta bërë Republikën e Kosovës vend kandidat për anëtarësim në Bashkimin Evropian. Ne ende jemi duke e konsoliduar shtetësinë e Kosovës, ende jemi duke e forcuar sovranitetin tonë, ende jemi duke u përballur me sfidat e tranzicionit të cilat po vërehen më së shumti në mangësitë në sundimin e rendit dhe ligjit, sistemin tonë arsimor dhe atë të shëndetësisë.

Përtej simbolikës së fuqishme të orientimit proevropian, ratifikimi i MSA-së duhet të shihet si fillim i një përkushtimi institucional dhe shoqëror për reforma të thella, të cilat do të forcojnë demokracinë tonë të brendshme dhe do ta përmirësojnë nivelin e qeverisjes dhe standardin e jetesës për secilin qytetar.

Kjo ditë dikur na dukej e paimagjinueshme dhe paarritshme. Kjo ditë erdhi. Kjo ditë është për gjeneratën e re të Republikës së Kosovës, për të gjitha mundësitë që atyre do t\’iu ofrohen për të pasur një të ardhme të sigurt. Ky ratifikim është një garanci për të gjithë ata prindër që shpeshherë janë ndier të pasigurt për të ardhmen e fëmijëve të tyre në këto vite tranzicioni dhe shtetndërtimi. Bashkë, me shumë sakrificë dhe shumë mund, po i arrijmë të gjitha, një nga një.

Hashim Thaçi, zv.kryeministër:

“Urime të gjithëve për ratifikimin e Marrëveshjes së Stabilizim Asociimit, të parës marrëveshje kontraktuale mes Republikës së Kosovës dhe Bashkimit Evropian. Kjo ngjarje e gëzuar shënon një sukses të shumëpritur për Kosovën në përmbushjen e aspiratave të popullit tonë për integrim në Bashkimin Evropian. Shpreh keqardhjen për largimin e partive të opozitës nga salla gjatë procesit të votimit por gjithsesi jam i bindur se ky veprim nihilist nuk e zbeh aspak rëndësinë e kësaj arritje historike të vendit tonë në politikën e jashtme”.

BE përshëndet ratifikimin e MSA-së

“Zyra e BE-së dhe përfaqësuesi special e mirëpresin ratifikimin e MSA-së në mes të Kosovës dhe BE-së si një hap të rëndësishëm përpara në rrugën evropian për Kosovën”, thuhet në urimin e BE-së bërë përmes një statusi në Twitter.

Bajram Gecaj, zv.ministër

Sot u miratua Marrëveshja e Stabilizim Asociimit, një hap ndër më të rëndësishmit për shtetin dhe popullin e Republikës së Kosovës – URIME.

Megjithate, për arësye të pastra politike, një pjesë e parlamentarëve lëshoj sallën duke u shndërruar kështu në Euro-Skeptik, pra duke krijuar edhe tek ne taborrin e kundërshtarëve të integrimeve evropiane.

Adritatik Kelmendi, gazetar:

Bojkotimi i seancës së MSA-së për shkak se ajo nuk është e njëjtë si e shteteve të tjera, i bie sikur të bojkotohej seanca e shpalljes së pavarësisë së Kosovës për shkak se nuk ishte me bekimin e OKB-së.

Në të dyja rastet, kjo do të ishte një huqje e madhe historike, me të cilën Kosova do të humbte shumë dhe askush nuk do të fitonte. As pushteti e as opozita.

Për këtë arsye, opozita e bashkuar me pjesëmarrje në seancë ka treguar pjekuri të madhe politike, por…

A është MSA-ja më e mira?

Jo!

A do të mund të negociohej më mirë?

Ndoshta!

A duhet të miratohet?

Absolutisht dhe definitivisht, PO!

Imer Mushkolaj, analist

“Thjeshtë, unë nuk po e kuptoj se çka po donë këta deputetët që nuk e votun MSA’në”.

Arianit Koci, avokat

“Interesi kombëtar mbi të gjitha. Pozita dhe opozita treguan pjekuri politike, me rastin e votimin të MSA-së. Urime!”. /tesheshi.com/