Nga Entela Canaj
Edhe pse në dukje i qetë dhe pa probleme madhore procesi i votimit sot në Shqipëri nuk ka mbetur pa incidente. Sipas të dhënave nga 1 mijë vëzhgues të Koalicionit Për Zgjedhje të Lira dhe të Ndershme kryesisht gjatë pjesës së parë të votimit janë evidentuar rreth 31 incidente.
Bëhet fjalë për incidente të izoluara; ku janë vërjetur raste të votimit familjar, apo të mungesës së garancisë për votë të fshehtë; apo të hyrjes së personave të paautorizuar në qendra votimi, e më keq akoma të bërjes fushatë pranë qendrave të votimit.
“Në tërësi situata është paraqitur e qetë dhe e rregullt por nuk kanë munguar incidentet, edhe pse të izoluara. Konkretisht vëzhguesit e Koalicionit për Zgjedhje të Lira, të Ndershme e Demokraci tregojnë për një sërë incidentesh të natyrave të ndryshme,” tha pasditen e sotme Mirela Bogdani, eksperte ligjore e KZLNDQ-së.
Kështu raportohet se ka pasur ndërpreje votimi në 4 raste në qytetet Tiranë, Shkodër dhe Fier; po ashtu në Tiranë dhe në Korçë është evidentuar se në 5 raste nuk u garantua fshehtësia e votimit; 3 raste të votimit familjar u raportuan në Dibër dhe Shkodër, 5 raste të asistencës së papërshtatshme të votuesve u panë në Tiranë dhe në Vlorë; 2 raste të personave të pautorizuar dhe 12 raste të zhvilimit të fushatës para Qendrave të Votimit.
Edhe sa i përket pjesëmarrjes së votuesve në këto zgjedhje, të paktën në pjesën e parë të procesit të votimit (nga mëngjesi deri në drekë) dominonin burrat. Në një pjesëmarrje në 30 %, 47 % gra dhe 53 % burra. Ndërkohë nisur nga të dhënat e KQZ-së për pjesëmarrje të votuesve deri në orën 16:00, vihet re se në qarqe dominon Kukësi me % më të lartë të votuesve; 54.68 % të votuesve, më pas vjen Dibra me 48.25 %, dhe pjesëmarrja më e ulët vihet re në Vlorë me 29.31 % të votuesve.
Incidentet e izoluara të raportuara nga vëzhguesit e KZLNDQ-së
– Katër (4) raste në të cilat votimi u pezullua për më shumë se 30 minuta (Tirana QV 1939; Shkodër QV 0089 dhe QV 0092; Fier QV 3034)
– Pesë (5) raste në të cilat fshehtësia e votimit nuk u garantua (Tirana QV 2082, QV 2009, QV 19791; Vlora QV 4585; Korçë QV 4103)
– Pesë (5) raste të asistencës në mënyrë të papërshtatshme në votim (Tirana QV 17721, QV 1926, QV 19791, QV 2127, Vlora QV 4585), si dhe 3 raste votimi familjar (Gjirokastër QV 4120, Dibër QV 1151; Shkodër QV 81).
– Dy (2) raste të presencës së personave të paautorizuar (në QV nr. 19791 në Tiranë, në QV nr. 4585 në Vlorë)
– Dymbëdhjetë (12) raste të të bërit fushatë përpara Qendrave të Votimit (në Durrës: QV nr. 1373, QV nr. 14602, QV nr. 1416; në Dibër QV nr. 1111; në Korçë QV nr. 3979, QV nr. 3740; në Tiranë QV nr. 18761, QV nr.1789, QV nr. 17121; në Shkodër QV nr. 259; në Vlorë QV nr. 4585, QV nr. 4598). /tesheshi.com/
