Ervin Salianji, deputet i PD-së, ka mohuar që në mbledhjen e grupit të PD të kishte debat mbi votat e ligjvënësve demokratë pro kandidaturës së Gramoz Ruçit, por ka konfirmuar se kishte dy linja të ndryshme.
“Në mbledhjen e grupit parlamentar pati shprehje e pakënaqësisë për votimin e djeshëm. Ka pasur dy mbledhje, në të cilën u diskutua për qëndrimet e PD në seancën e nesërme parlamentare. Shqetësimi i anëtaërve të grupit parlamentar të PD është manipulimi apo blerja e votës”, tha Salianji.
Ai pohoi se çdo deputet ka dhënë mendimin e tij në lidhje me atë çka ndodhi në seancë, ndërsa iu përmbajt idesë se kjo ishte një lojë e kryeministrit Edi Rama, për të tërhequr vëmendjen nga zgjedhja e Ruçit.
“Diskutimet nuk janë të vërteta, por secili nga deputetët ka pasur mendimin personal. Sot ka pasur një qëndrim të të gjithë grupit parlamentar të PD. Sot u mbajtën qëndrimet e plota. PD dënon me ashpërsi atë që ndodhi dje. Erdhi prej manipulimit apo blerjes së votës kjo mbetet për t’u parë. Kush shet votën nuk do të ketë vend në grupin parlamentar të PD. Nëse dikush ka tradhtuar shpirtin e vet, PD do e shohë me prioritet absolut duke marrë masa. Unë mbajta qëndrimin tim direkt dje për manipulim, por qëndrimi i PD sot është më i detajuar duke shtuar dhe mundësinë se mund të jetë blerë vota”, u shpreh ai.
Por qëndrimi i manipulimit, sikundër pretendojnë disa nga deputetët e rinj, u kundërshtua fort nga ish-kryeministri Sali Berisha.
Sipas burimeve nga PD, Berisha e ka cilësuar thikë pas shpine votat pro Ruçit të deputetëve demokratë. /tesheshi.com/
