Debatit mbi dy votat pro të deputetëve të PD për zgjedhjen e Gramoz Ruçit në postin e kryeparlamentarit i është bashkuar edhe ish-ministrja Majlinda Bregu.
Kjo e fundit shkruan në një koment në rrjetet sociale, se PD ka humbur shpirtin, duke kujtuar mungesën e analizës pas zgjedhjeve të 25 qershorit.
Reagimi i Bregut:
Si anëtare e Partisë Demokratike, i drejtoj një lutje publike udhëheqjes së re politike të Partisë së Republikës së Re!
Mirë nga humbja në humbje na udhëhoqët me aq sukses sa nuk ju mposht dot njeri, por tani ju lutem në emër të shumë grave e burrave që e kanë të pamundur ta braktisin PD-në dhe mendojnë se ju që mbani siglën, në mos mishin, kockën do ja ruanit PD-së, mos na bëni edhe paturpërisht qesharake!
PD-së i humbi gjysma e grupit, në errësirën totale ku u përpiluan listat e deputetëve dhe ju nuk u mblodhet të gjeni fajtorin!
Ose më mirë, se gati harrova. U mblodhët pas ” fitores” së 25 Qershorit, për t’i vënë kurorën e dafinës “FITIMTARIT”, që ai ta kishte më të lehte të vidhte brenda shtëpisë së tij!
PD humbi 10 vende të tjera në parlament, në dritën e diellit të zgjedhjeve të humbura të radhës dhe ju prapë, nuk u mblodhet të gjeni fajtorin!
PD ka humbur shpirtin dhe i ka mbetur vetëm mishi-tul në kokë, i udhëheqjes së lavdishme të Republikës së Re dhe ju prapësëprapë, nuk mblidheni të gjeni fajtorin!
Tani na qenkeni mbledhur për të thënë se “kush shet votën s’ do ketë vend në Grupin Parlamentar”. Ou? Po për atë që vjedh votat e njerëzve të shtëpisë dhe shet 240 mijë vota, ku është vendi?!
Po pse nuk e paskan të drejtën as tre njerëz që të kenë një mendim të fshehte ndryshe nga udhëheqja e re politike?!
Pse këta s’paskan të drejtë për mendim të fshehte siç pat Kryetari të drejtën e marrëveshjes së fshehtë?!
Se mirë për mendime të hapura u mor vesh që të përpin errësira, po as në errësirë nuk u lejoka më të mos jesh i përpirë?!
Aman mos na e nxirrni bojën fare,fare,fare, se janë vërtet gjynah demokratët që s’ju ikët nga PD, edhe kur ju të udhëheqjes së Partisë së Republikës së Re, s’po lini gjë pa bërë për t’i treguar gjithë dynjasë se PD e vërtetë, është vetëm një kujtim i të shkuarës.
