Mbledhja e grupit parlamentar, një ditë pas zgjedhjes së Gramoz Ruçit në postin e kryetarit të Kuvendit, ka rikthyer Sali Berishën në PD, jo si një deputet të thjeshtë, por me staturën e një lideri me dorë të fortë.
Berisha nuk ka lejuar zhvillimin e debateve mbi faktin që dy deputetë votuan pro Ruçit, as ka pranuar versionin e disa të tjerëve që votat u manipuluan, por kërkoi prerazi që ata që shkelën vendimin të marrin përgjigjen e duhur.
Burimet nga PD theksojnë se në mbledhjen e grupit parlamentar, Berisha veçanërisht është treguar i ashpër me Ervin Salianjin, një prej deputetëve që nxitoi mbrëmjen e djeshme variantin e manipulimit të rezultatit.
Në këtë kuadër ish-kryeministri është treguar i prerë, duke kërkuar që askush më të mos flasë në emër të grupit për vendime që i takojnvë grupit. “E dini ju se çfarë është grupi? Kush del në emër të tij, merr miratimin e grupit”, i është drejtuar Berisha, Salianjit.
Deputetë të PD-së shprehen për tesheshi.com se kishin kohë që nuk kishin parë një vendosmëri të Berishës dhe një tonalitet të tillë, që nga momenti që dha dorëheqjen si kryetar i PD-së në 2013-ën. Por duket se ngjarja e ndodhur në Kuvend, pasditen e djeshme, dhe frika nga një rrëshqitje e votave të deputetëve të PD-së në të ardhmen, për çështje që mund të kërkojnë shumicë të cilësuar, ka detyruar ish-kryeministrin që të marrë në dorë frenat dhe këtë ai di ta bëjë shumë mirë.
Historia në PD ka treguar se të gjitha grupimet që rivalizonin njëri-tjetrin nuk mund të ngrinin kokë përsa kohë partia drejtohej nga Berisha, gjë që u pa në 4 vitet e fundit kur një tërheqje ndoshta edhe taktike në 2013, nxorri në pah përplasjet, mosmarrëveshjet, qejfmbetjet dhe armiqësitë në partinë që për 23 vjet ka pasur vetëm një kryetar.
Debatet
Berisha: Kush e bëri na futi thikën mbrapa. Nuk duhet ta falim atë që e bëri. Se nuk jemi vetëm, është populli qe na gjykon. Nuk mund të gjejmë pretekst që ti hedhim hi syve.
Salianji: Unë bindem vetë
Berisha: Pa mbledhje grupi nuk mund të prononcoheni. Grupi është grup. Të pranoj unë se je ti i bindur për gabim se pranoj. Unë kam bindjen qe aty është tradhti. Kush del ne emër të grupit, merr miratimin e grupit nuk del vetë. Kjo që thua ti nuk ka ndodhur në 27 vjet, manipulimi i komisionit. Ky ka hyrë në parlament rishtas dhe nuk di. Mos hidhni ujë në hava. Duhet të mbyllet me një dënim të këtij akti. Me një qëndrim të kryesisë së grupit që të mbajë qëndrim të qartë: ta dënojmë dhe të marrim masa.
Basha: Ervin boll tani. Nuk ka rendësi përshtypja jote. Le te mbajmë qëndrim si thotë doktori. /gj.k/ /tesheshi.com/
