PS ka pranuar të bëjë një “gjunjëzim” para opozitës, për hir të 85 votave me të cilat duhet të kalojë Ligji për shkollën e Magjistraturës, edhe ky pjesë e reformës në drejtësi.
Ka qenë kreu i grupit socialist, Taulant Balla, që i është “lutur” opozitës ta votojë, jo tani por më 3 shtator, edhe duke pranuar të gjitha amendimet që kërkon ajo.
“PS bëri të gjitha përpjekjet për të garantuar votën e cilësuar në Kuvendin e Shqipërisë, pra 84 vota në funksion të rivendosjes në afat të një dispozite kalimtare që ka të bëjë me pranimet në Shkollën e Magjistraturës dhe të rishprehim gatishmërinë tonë që që në seancën e parë të 3 shtatorit, pasi dielli dhe vera të ketë qetësuar shpirtrat dhe mendjen e trazuara të opozitës, vendimi i parë që duhet të votojmë bashkë me PD dhe LSI është pikërisht mundësimi i pranimeve të reja në shkollën e Magjistraturës për të mos vonuar një vit djem dhe vajza ekselentë që kanë studiuar drejtësi dhe që përmushin kriteret, por që sigurisht do të kalojnë konkursin profesional me qëllim që 50 ndër ta të vijojnë studimet në Magjistraturë. Besoj që kjo rishprehje nga ana jonë e kësaj gatishmërie përmban në vetvete edhe propozimin tonë për opozitën: le ta shkruajnë ata amendamentin dhe ne do ta votojmë”, deklaroi Balla.
Opozita e ka bllokuar këtë ligj, mu në kohën kur po shpreh akuzat e saj ndaj mënyrës se si po aplikohet reforma në drejtësi. Në gjykimin e saj, kjo reforme po dështon, ndërsa shkollën e Magjistraturës, kreu Basha e ka cilësuar si “shkollë partie”, sipas tij me qëllimin që Rama të kapë drejtësinë. /tesheshi.com/
