Lëvizja Vetëvendosje ka njoftuar se ka dorëzuar në Gjykatën Supreme të Kosovës ankesën ndaj vendimit të djeshëm të Panelit Zgjedhor për Ankesa dhe Parashtresa (PZAP). Sipas anëtarit të kësaj partie në KQZ, Adnan Rrustemi, LVV pret që në afat sa më të shpejtë vendimin që mundëson numërimin e fletëvotimeve që vijnë nga diaspora.
“Sot Lëvizja VETËVENDOSJE! dorëzoi në Gjykatën Supreme ankesën me qëllim lejimin e numërimit të të gjitha pakove me fletëvotime nga bashkatdhetarët tanë si dhe hedhjen poshtë të vendimit të PAZP-së. Presim që në afat sa më të shpejtë Gjykata Supreme të marrë vendim duke ia mundësuar realizimin e të drejtës për të zgjedhur dhe numërimin e fletëvotimeve të qytetarëve tanë me banim jashtë Kosovës”, thuhet në njoftim.
“Rikujtojmë edhe njëherë se pakot me fletëvotime janë dërguar brenda afateve kohore nga bashkëatdhetarët dhe si të tilla ato duhet të numërohen dhe të bëhen pjesë e rezultatit final të zgjedhjeve në Republikën e Kosovës”, thuhet në fund të njoftimit të Lëvizjes Vetëvendosje.
Dje gjatë ditës, PZAP mori vendim që të refuzohet apeli nga kjo parti në lidhje me numërimin e rreth 5 mijë votave të ardhura nga shtetasit që jetojnë jashtë vendit. Vetëvendosje konsideron se vota e diasporës është përcaktues i fituesit të zgjedhjeve të 6 tetorit. /tesheshi.com/
