Kreu demokrat, Lulzim Basha paralajmëroi aktivizimin e protestave për të kërkuar futjen e procesit të votës elektronike në zgjedhjet e 18 qershorit, të cilët, siç po shihet ditë pas dite, opozita po e shndërron në një kauzë politike, edhe pse po has në kundërshtimin edhe të ndërkombëtarëve.
Por protestave, Basha iu vu në tjetër emër: aksion qytetar, edhe pse fjalën protestë nuk e shmangu nga artikulimi.
“Mesazhi që kam sot është se koha për zgjidhje institucionale po mbaron dhe nuk ka vullnet. Qeveria po luan me kohën. Çdo ditë që kalon është kohë e humbur. Ndaj është koha për një aksion politik mbarëqytetar. PD po nis shqyrtimin e të gjitha opsioneve, përfshirë protestat, për të arritur atë që kjo qeveri e korruptuar ka refuzuar ta bëjë në rrugë institucionale”, ka theksuar kreu i opozitës. Ai sërish këmbënguli se votimi dhe numërimi elektronik është i mundur.
“Lëvizjet e fundit kanë asgjësuar një koalicion politik dhe kanë zbuluar një qeveri që diktohet nga bandat kriminale. Ka diçka të dobishme për çdo shqiptar, të djathtë apo të majtë, është dëshmia jo e një por e dy anëtarëve të kabinetit se lidhjet me krimin, me Balilajt dhe Habilajt, Edi Rama i ka në funksion të kapjes dhe prishjes së zgjedhjeve të ardhshme parlamentare….
Kjo është arsyeja pse Rama refuzon votimin elektronik. “Pa dyshim votimi elektronik nuk zgjidh gjithçka, por jep besim tek votuesit. Nuk ka rëndësi se çfarë mendojnë individët, zgjidhjet që ne kemi shtruar në tavolinë janë të realizueshme”, ka vijuar Basha.
Opozita shqiptare prej një viti nuk organizon më protesta në rrugë. E fundit ishte ajo e dhjetorit të kaluar ku u sulmua bunkeri tek oborri tek Ministria e Rendit. Më pas, ajo thjesht u është bashkuar disa protestave të shoqërisë civile. /tesheshi.com/
