Shkëmbime të hidhura replikash në parlamentin Europian ndërsa debatohej vota e Britanisë së Madhe për t’u larguar nga Bashkimi Europian. Një nga figurat qendrore në fushatën Brexit, lideri i partisë euroskeptike britanike UKIP, Nigel Farage u fishkëllye, u quajt gënjeshtar dhe në një pikë, madje, u akuzua për përdorim të “propagandës naziste”.
Por, në fjalimin e tij Farage ishte i ashpër kur u tha anëtarëve të parlamentit se “ju si projekt politik jeni një mohim”. Ai tha se vështirë se ndonjë prej tyre kishte bërë një punë të përshtatshme në jetën e vet, apo të kishte krijuar një vend pune.
Parlamenti mbajti një sesion special në prag të takimit midis liderëve europianë dhe kryeministrit britanik, David Cameron- takimi i parë mes tyre që pas daljes së rezultatit të referendumit për largimin e Britanisë nga BE.
Cameron ka dhënë dorëheqjen, me argumentin se do t’i takojë pasardhësit të tij të aktivizojë metodën formale me anë të së cilës vendet mund të largohen nga blloku dhe i cili do të drejtojë negociatat me këtë synim.
Parlamenti Europian miratoi mocionin me anë të të cilit apelohet Britania të aktivizojë sa më shpejt, madje menjëherë nenin 50 të traktatit të Lisbonës për daljen nga blloku.
Duke hapur sesionin në parlament, presidenti i Komisionit Europian, Jean-Claude Juncker, tha se qeveria britanike duhet të “qartësojë” pozicionin e vet. Juncker tha se vullneti I popullit britanik duhet të respektohet, duke nxitur duartrokitje nga lideri i partisë së Pavarësisë së Britanisë, UKIP, Nigel Farage, një figurë qendrore në fushatën Brexit.
“Ju po luftoni për daljen, populli britanik votoi në favor të daljes. Përse jeni këtu”, e pyeti atë Juncker. Ai akuzoi, gjithashtu, Farage se ka gënjyer për përdorimin e fondeve që dërgohen në BE për shërbimin kombëtar të shëndetësisë, duke thënë se “ka fabrikuar një realitet tjetër”. Përdorimi i këtyre fondeve ka qenë një nga argumentet mbi të cilat u mbështet fushata Brexit.
Të tjerë anëtarë të parlamentit shkuan edhe më tutje, pasi ish-kryeministri belg, Guy Verhofstadt, lideri i grupit liberal në parlament, tha se Farage ka përdorur “propagandë naziste” në fushatë duke iu referuar një posteri që tregonte radhët e refugjatëve.
Në një sulm të maskuar ndaj fushatuesit të Brexit, Boris Johnson, dhe kandidat për të pasuar Cameron në detyrën e kryeministrit, Verhofstadt tha se “bëhet fjalë për egoizmin e një personi të përgatitur për të bërë gjithçka për t’u bërë kryeministër i Britanisë”.
Manfred Weber, kreu i partive popullore europiane tha: “Koha e hezitimit ka marrë fund. Duhet të qëndrojmë fort për projektin europian”.
“Kërkojuni falje britanikëve, turp të kesh”, i tha ai duke shtuar se i duhet dhënë fund këtyre populizmave në lidhje me Brukselin.
Në kundërpërgjigje, Farage i tha parlamentit se ata ishin mohues. “Ne tashmë ofrojmë një copëz shprese për demokratët në të gjithë kontinentin europian”, tha ai. “Britania e Madhe nuk do të jetë anëtari i fundit që do të largohet nga Bashkimi Europian”.
Liderja e Frontit Nacional Marine Le Pen, e cila dëshiron që edhe Franca të mbajë referendum për anëtarësinë në BE, u tha deputetëve të parlamentit Europian “të heqin ato vështrime të ngrysura dhe të shijojnë emancipimin” e popullit britanik.
Ndërkaq, në një fjalim në parlamentin gjerman, kancelarja gjermane, Angela Merkel tha se BE ishte e fuqishme mjaftueshëm për të mbijetuar edhe pa Britaninë e Madhe. Ajo tha se e respekton rezultatin dhe paralajmëroi bllokun se nuk do të tolerojë “favore” në negociatat e daljes.
“Duhet të ketë dhe do të ketë një diferencë të dukshme midis vendeve që janë anëtare dhe jo anëtare të familjes Europiane”, tha ajo.
Përgatiti: Juli Prifti – /tesheshi.com/
