Në rast se Kuvendi i Kosovës nuk konstitutohet sa më parë, veç pritet të nisin problemet që do sjellin pasoja jo të pakta.
Një prej tyre është pamundësia që të rishikohet buxheti ku nëse ndodh një gjë e tillë pasojat do jenë jo të pakta në kryerjen e obligimeve shtetërore.
“Janë 112 milionë euro mungesë në buxhetin e shtetit”, ka deklaruar ministri në largim i Financave, Avdullah Hoti.
Kjo mungesë e mjeteve buxhetore për kryerjen e obligimeve që ka qeveria, nga ekspertë të çështjeve ekonomike vlerësohet se do të përcillet me pasoja të mëdha për ekonominë e gjithëmbarshme të vendit.
Kryetari i Odës Ekonomike të Kosovës, Safet Gërxhaliu ka deklaruar për Radion “Evropa e Lirë” se pasojat mund të jenë të pariparueshme, në rast të moskonstituimit sa më të shpejtë të Kuvendit dhe më pas rishikimit të buxhetit.
“Nëse nuk do të kemi rishikim të buxhetit dhe kemi këtë mungesë të mjeteve jo vetëm që do të dështojnë projektet kapitale, qoftë në infrastrukturë, qoftë në fushat tjera, por do të jetë një goditje e drejtpërdrejtë për sektorin privat, sepse sektori privat në pjesën dërmuese është zbatues ose ekzekutues i këtyre punëve”, thotë Gërxhaliu.
Një nga projektet për të cilat obligimet kanë mbetur të papërfunduara për shkak të mungesës së mjeteve buxhetore, është autostrada Prishtinë-Hani i Elezit.
Kujtojmë se Komisioni Qendror i Zgjedhjeve tanimë ka shpallur rezultatin përfundimtar të zgjedhjeve të parakohshme të 11 qershorit. Ky rezultat pritet të certifikohet dhe më pas, brenda një muaji të konstituohet Kuvendi. /tesheshi.com/
