Presidentja e Komisionit Evropian Ursula von der Leyen tha në forumin e sigurisë në Bratislavë, në pjesën e fjalimit të saj kushtuar Ballkanit Perëndimor, se “tensionet e fundit” në rajon janë shqetësuese.
“Tensionet e fundit janë sigurisht shqetësuese. U bëj thirrje të gjitha palëve që të distancohen nga konfrontimi dhe të marrin masa për të rivendosur qetësinë”, tha ajo në forumin “GLOBSEC 2023”.
Von der Leyen nuk specifikoi se për cilat tensione po i referohej. Në fjalimin e saj, i cili iu kushtua më së shumti luftës në Ukrainë, ajo tha se “valët tronditëse të dërguara nga lufta e agresionit të Putinit kanë arritur edhe gjashtë partnerët tanë nga Ballkani Perëndimor”.
“Por kjo vetëm na afroi”, shtoi ajo dhe theksoi se BE-ja shtriu edhe në Ballkanin Perëndimor të njëjtat masa solidariteti që ndërmori brenda Unionit.
Një nismë e re për Ballkanin Perëndimor
“Ne mbështetëm familjet vulnerabël me kosto të lartë të energjisë. Ne po ndërtojmë infrastrukturë të re për të reduktuar varësinë e Ballkanit Perëndimor nga karburantet fosile ruse. Dhe ky bashkëpunim praktik shkon paralelisht me progresin në rrugën drejt BE-së”, tha Von der Leyen.
Presidenti i Komisionit Evropian prezantoi një iniciativë të re për Ballkanin Perëndimor, qëllimi i së cilës është që këto vende të ndjejnë përfitimet e anëtarësimit në BE tashmë sot.
“Ne duam të sigurojmë disa nga përfitimet e anëtarësimit në BE për popujt e Ballkanit Perëndimor sot,” tha Von der Leyen.
Është një plan për rritje ekonomike të bazuar në katër shtylla. E para është afrimi i Ballkanit Perëndimor me tregun e përbashkët evropian, shtylla e dytë është thellimi i integrimit ekonomik brenda rajonit, i treti është përshpejtimi i reformave dhe i katërti është rritja e ndihmës para anëtarësimit.
Qasja në tregun e vetëm
“Ne nuk kërkojmë nga partnerët tanë të bëjnë hapa drejt nesh, por ne bëjmë edhe një hap të madh drejt tyre. Qëllimi ynë i përbashkët është të përshpejtojmë rrugën e tyre drejt BE-së dhe kjo është arsyeja pse ne po e afrojmë Bashkimin tonë me Ballkanin Perëndimor”, tha Von der Leyen.
Duke folur për shtyllën e parë të qasjes së re ndaj Ballkanit Perëndimor, Von der Leyen thotë se në të gjitha vendet që iu bashkuan BE-së në dy dekadat e fundit, aksesi në tregun e vetëm ishte shtytësi kryesor i rritjes ekonomike.
“Megjithatë, vendet që janë tashmë në rrugën e tyre të mirë drejt BE-së duhet gjithashtu të përfitojnë nga tregu i vetëm,” thotë Von der Leyen, duke përmendur si shembuj aksesin në tregun e vetëm dixhital në fusha të tilla si tregtia elektronike ose siguria kibernetike.
“Dëshiroj që tregu ynë i vetëm të jetë shtytësi i ndryshimit, jo vetëm në vendet që tashmë i janë bashkuar familjes sonë, por edhe në ato që janë ende në rrugë”, tha kryetarja e Komisionit Europian. /tesheshi.com/
