Presidentja e Komisionit Evropian, Ursula von der Leyen tha se është e pamundur të imagjinohet e ardhmja e Bashkimit Evropian pa anëtarësimin e vendeve të Ballkanit Perëndimor, Ukrainës dhe Moldavisë.
“Kur shikojmë përpara dhe imagjinojmë se si do të duket Evropa… A mund ta imagjinojmë BE-në pa Ballkanin Perëndimor, Ukrainën dhe Moldavinë, të cilat janë të gjitha nën ndikimin e Kinës dhe Rusisë? E pamundur”, tha Von der Leyen në Madrid.
Duke folur së bashku me kryeministrin e Spanjës, Pedro Sánchez, në konferencën për shtyp të mbajtur me rastin e marrjes së presidencës së Këshillit të BE-së nga Spanja, ajo vlerësoi se është e nevojshme të mendohet se si këto vende mund të bëhen anëtare të BE-së.
“Duhet të fillojmë të mendojmë se si të sigurohemi që Evropa të bëhet e tërë, që këto vende të jenë pjesë e BE-së. Këto janë parime dhe ne duhet të merremi me to sa më shpejt që të jetë e mundur, sepse duhet kohë për të përfunduar gjëra të tilla”, tha Von der Leyen.
“Çështja e zgjerimit të BE-së është në tryezë”
Kryeministri spanjoll Sanchez theksoi se çështja e zgjerimit të BE-së është “në tavolinë” dhe se do të diskutohet, si dhe tema të tjera.
“Pyetja më e rëndësishme që duhet të përgjigjemi është se si e shohim BE-në në katër deri në dhjetë vitet e ardhshme. Nga këndvështrimi im, besoj se duhet të federalizojmë edhe më shumë, të sigurojmë më shumë sovranitet dhe më shumë politika, të gjejmë përgjigje të përbashkëta për pyetjet”, tha Sanchez.
Komisionerët e BE-së u takuan me qeverinë spanjolle në Madrid për të diskutuar planet e Spanjës për presidencën gjashtëmujore të Këshillit të BE-së.
Kryeministri spanjoll Pedro Sanchez filloi presidencën spanjolle të Këshillit të BE-së të shtunën me një vizitë në Kiev, gjatë së cilës ai konfirmoi mbështetjen e Unionit për Ukrainën. /tesheshi.com/
