Kryetarja e bashkisë së Shkodrës Voltana Ademi thotë se kryeministri Edi Rama kërcënoi Shkodrën se nuk do të marrë fonde nga qeveria nëse nuk prish ndërtimet përreth stadiumit. Përmes një deklarate për median Ademi e quan ‘skandaloze” dhe të papranueshme” kërcënimin dhe akuzon Ramën se pas saj fshihet hakmarrja e tij për Shkodrën që s’e votoi. Ademi tha se nuk do të shkelë ligjin sa i takon objekteve që janë me pronarë dhe akuzoi Ramën se po bllokon zhvillimin e qytetit më të madh verior.
“ Mbrëmë në prani të dhjetra vetëve në ambientet e stadiumit Loro Boriçi, Edi Rama u hakërrue duke më thënë se Shkodra do të ketë zero fonde. Zero fonde e përsëriti 10 herë kryeministri i Shqipërisë”, tha Ademi. Sipas saj, nuk është vetëm kërkesa e tij për prishjen e shtëpive pranë stadiumit arsyeja e këtij kërcënimi, por bëhet fjalë për një sjellje politike hakmarrëse ndaj nje qyteti e ndaj banoreve të tij, që nuk e kanë votuar Edi Ramën.
“Dua t’i bëj të ditur kryeministrit se shtëpitë me leje, prona, qytetarët dhe ligji janë më të rëndësishëm se pushteti dhe bashkia se unë e qeveria, më të rëndësishëm se Edi Rama”, thotë Ademi. /tesheshi.com/
