Pasi ka dorëzuar një më një e pa shumë zhurmë të gjitha bashkitë ku qeveriste, opozita duket se do bëjë një rezistencës me dy bastionet e saj, Shkodrën dhe Kamzën. Kjo vetëm si simbolikë politike, pasi zyrtarisht, si Mziu e si Ademi nuk mund të ushtrojnë dot asnjë kompetencë. Mjafton fakti se as rroga nuk marrin dot, as ata e as stafi i tyre. Por që të dy janë përbetuar të mos lëshojnë zyrat.
Më delikate situata përaqitet në Shkodër, aty ku javë më parë u eksperimentua dhe rebelizmi me djegie e bastisje KZAZ-sh të 30 Qershoit, gjithsesi duke mos ja dalë dot të pamundësojnë procesin e votimit. E ndërkohë, në kulmin e atyre zhvillimeve me tym e flakë, Rama aludoi për provokimin e një “2 Prilli”.
Gruaja në krye të aksioneve opozitare, Voltana Ademi, njeriut që i ka rënë bara e rëndë t’a dorëzojë Shkodrën te PS-ja pas 27 vitesh dominim demokrat, duket se po provon sërish të jetë “kështjellë e pamposhtur”.
Edhe pse në zyrën e saj ishte kreu i OSBE-së Bernd Boschardt, dukshëm me mision këshillues për t’u treguar e arsyeshme, nga zyra e Ademitka dalë së fundi një përbetim me nota epike për moslëshim zyre.
Duke i thirrur në ndihmë së djeshmes, pra, referuar anti-komunizmit emblematik të Shkodrës, znj.Ademi me stilin tipit të ligjërimit të lidërshipit të partisë së saj, shpall:
“Asnjë hap pas! Shkodranët janë të vendosur të mbrojnë vlerat për të cilat i’u vunë përballë për 45 vite diktaturës. Shkodranët janë të bindur në rrugën e tyre për rikthimin e vendit në shinat e demokracisë.
Shkodranët e kanë të qartë se rreziku vjen nga banda kriminale që ka uzurpuar parlamentin, qeverinë dhe po kërkon të pushtojë edhe qeverisjen vendore.
30 Qershori ishte referendumi popullor që i tregoi klikës në pushtetin e uzurpuar se është pakicë, që i tregoi edhe mbarë botës se shumica e shqiptarëve refuzojnë partinë – shtet, monizmin pas 30 viteve pluralizëm.
Shkodra ia dha përgjigjen juntës anti- kushtetuese të Edi Ramës, me një braktisje të pashembullt, nga të majtë e të djathtë.
Lufta me krimin shtetëror është e vështirë dhe ne shkodranët e dimë mirë! Me vendosmëri, sepse s’ka rrugë tjetër!”, shkruan ndër të tjera kryebashkiakja e Shkodrës.
Kështu, ngjan se Shkodra është zgjedhur si një tjetër fushë-betejë politike nga ana e opozitës, pasi kapitulluar në të tjera para saj, duke mbërritur, pas zgjedhjes së strategjisë së daljes në rrugë me djegie mandatesh e bojkot zgjedhjesh, në nivelin më fundor të potencës politike, pasi nuk posedon më asnjë pushtet. /tesheshi.com/
