Profili i kandidates së Partisë Demokratike për Bashkinë e Shkodrës
Nga Ylli Pata
Lulzim Basha, realisht i dërguari i tij, Arben Imami për Shkodrën, ndryshuan letrat në momentin e fundit, pas sugjerimit të kompanisë amerikane që këshillon Bashën, që kandidatja e PD-së në Shkodër të jetë sërish një grua.
Më i kuotuari në fushatën paraprake ishte Sokol Ramadani, por mundësia reale e avancimit të Keti Bazhdarit, bëri që partia mazhorancë në Shkodër që prej 20 vitesh të lëvizë me planin B. Synimi: Bazhdarit t’i sfumohet një nga avantazhet e saj; të qenit grua.
Ndaj lideri i opozitës, Lulzim Basha, prezantoi sot në Shkodër, Voltana Ademin si kandidate për bashkinë e Shkodrës, duke prekur edhe një pikë të rëndësishme të qytetit, që është ikja masive e njerëzve drejt Perëndimit, e kryesisht Gjermanisë për një jetë më të mirë.
Ra në sy sot në prezantimin e kandidates mungesa e ish-kreut të Kuvendit, Jozefina Topalli, kryetarit të bashkisë Lorenc Luka dhe disa prej drejtuesve të PD-së lokale, madje edhe të Sokol Ramadanit, një emër i lakuar për të garuar për bashkinë.
Po kush është deputetja që la mandatin për t’i hyrë një gare të fortë, ku për herë të parë Shkodra rrezikon të votojë kundër PD-së?
Ka lindur në të njëjtin vit me Lulzim Bashën dhe vajzën e ish-kryeministrit Berisha, Argitën. Është një zgjedhje që PD e bën sa herë është në vështirësi dhe vetëm kur është në opozitë në nivel kombëtar.
Zonja Voltana Ademi është një përfaqësuese e familjes mikse, ku vetë është muslimane dhe bashkëshorti katolik. E diplomuar në informatikë, Voltana Ademi është vetëm 6 vjet më e madhe se rivalja e saj Keti Bazhdari, pra është 42 veç, ndërsa ka një karrierë intensive politike. Të cilën e ka nisur natyrisht në bashkinë e Shkodrës, në vitin 2004 kur është emëruar nënkryetare e këtij institucioni. U ftua nga kryebashkuiaku Artan Harxhi, një profesor universitar, edhe ai me familje mikes nënën katolike dhe babanë musliman.
Me ardhjen e Lorenc Lukës si kryetar bashkie, zonja Ademi u largua dhe nuk iu afrua ndonjë post relevant. Arsyeja; marrëdhënie të ngurta me Jozefina Topallin dhe njerëzit e saj në pushtet. Lorenc Luka i pari. Por Kryeministri i kohës, Sali Berisha, i cili gjithmonë njërin sy e njërin vesh, madje dhe njërën dorë e ka pasur gjithnjë në zgjidhjet në qytetin verior, për të zbutur gjakrat, rilançon Voltana Ademin në vitin 2011 duke e emëruar Prefekte e Qarkut, dhe 4 vite më pas, sërish kundër vullnetit të Jozefinës së “hekurt” e vendos në listat për deputetë. Në fakt, doktori nuk e ka pasur gabim.
Për dy vjet Voltana Ademi krijoi profilin e saj si përfaqësuesja me e zëshme dhe krejt ndryshe e Shkodrës, që përgjithësisht ka pasur deputetë ose burra që flasin ashpër, ose gra që shajnë rëndë kundërshtarin e lavdërojnë shefin. Zonja Ademi, sidomos me denoncimin nominal ndaj deputetit Arben Ndoka për kërcënim, tregoi dinjitet, i cili i është vlerësuar edhe nga rivalët e saj politikë.
E diplomuar për informatikë, Voltana Ademi, ka dhënë këtë lëndë . në Universitetin Luigj Gurakuqi të Shkodrës. Ashtu si rivalja e saj, Keti Bazhdari, zonja Ademi e ka fituar këtë status aktual me përplasjen direkte me të pushtetshmit lokalë dhe me “bekimin” e krerëve të mëdhenj.
Por gjithsesi Voltana Ademi është anëtare e Partisë Demokratike që në vitin 1996, kur ishte vetëm 22 vjeç dhe ende nuk kishte kryer Universitetin.
Sfida e Voltana Ademit për bashkinë e Shkodrës, është në fakt basti i karrierës së saj në një institucion që e njeh pasi ka punuar, por me një parti realisht jo të bashkuar. Vetë mungesat vip në prezantimin e sotëm ishin një shenjë jo e vogël. Megjithatë këtë problem e ka edhe rivalja e saj Keti Bazhdari me mbështetësit e Tom Doshit.
Megjithatë, pranimi i saj për të garuar me një grua tjetër, krijon premisat e një beteje më të butë, e cila është deklaruar menjëherë nga Bazhdari sapo doli emri i Ademit.
Dhe s’kishte si të ndodhte ndryshe me një qytet që mitin e tij e ka një femër; Rozafën. Më 22 qershor, edhe “shefja” e kalasë së Shkodrës do të jetë zyrtarisht një grua…
/tesheshi.com/
