Volfsburgu i mbrëmshëm ngjante disi me Lestërin e kampionatit anglez. Pavarësisht se qe cilësuar ekipi më i dobët mes tetë çerekfinalistëve të Champions League-s, me gjithë formën e dobët të treguar në Bundesligë, Volfsburgu i bëri një surprizë Realit të Madridit, duke e vënë me shpatulla pas muri.
Në “Volkswagen Arena”, skuadra vendase bëri një paraqitje brilante, duke i befasuar që në minutën e parë spanjollët me ritmin e tyre. Golat nuk vonuan të vinin për vendasit. Rodriguez në minutën e 18-të me 11-metërsh e Arnold në të 25-ën i dhanë epërsinë 2-0 Volfsburgut.
Madrilenët u kujtuan të luanin më pas, por dëmtimi i Benzemasë dhe dalja e tij nga loja lanë një gropë në sulmin e miqve. Epërsia dhe këmbëngulja e tyre nuk u konkretizuan as në pjesën e dytë.
Vendasit mund t’i kishin thelluar shifrat nëse do të ishin treguar më të përpiktë në kundërsulmet e fundit të lojës. Gjithsesi, rezultati 2-0 është mjaft i mirë për takimin e dytë të pas pak ditëve.
Në Madrid do të shohim një ndeshje krejt tjetër, por nëse Volfsburgu kalon në gjysmëfinale, kjo do të ishte surpriza më e madhe e këtij edicioni të Champions League-s.
Në takimin e Parisit pati ekuilibër në rezultat, teksa PSG-ja dhe Mançester Siti e lanë për 90 minutat e dyta zgjidhjen e çështjes së kualifikimit për në gjysmëfinale.
Me belgun De Bruyne në fushë, skuadra angleze kishte tjetër pamje, duke fituar shumë më tepër cilësi e gjallëri, diçka që i ka munguar fort në javët e fundit. Eshtë pikërisht ky futbollist që hapi serinë e golave në minutën e 38-të.
Tre minuta më vonë përgjigjet Ibrahimoviç, që shënon e shlyen gabimin e minutës së 14-të, kur nuk ia
doli ta kthejë në gol një 11-metërsh të pritur mjeshtërisht nga Hart.
Rabiot i kalon në avantazh parizienët në të 59-ën minutë, kurse barazimi vjen nga Fernandinho në të futur të çerekorëshit të fundit të lojës.
Barazimi 2-2 i shkon më për mbarë Mançester Sitit, që është pranë vajtjes për herë të parë në gjysmëfinalet e këtij aktiviteti. Sidoqoftë, PSG-ja ka aftësinë dhe cilësinë për të dalë fituese në takimin e dytë. Në çdo rast, do të jetë një përballje mjaft tërheqëse. /tesheshi.com/
