Presidenti i Federatës së Futbollit të Kosovës, Fadil Vokrri, beson se Kosova shumë shpejt do pranohet në instancat më të larta të futbollit në europë dhe në botë, sidomos pas mesazhit që dhanë me ndeshjen me Shqipërinë.
“Ideja ishte që heronjtë tanë me në krye Presidentin Duka, ti mirëpresim në Prishtinë, ashtu edhe siç e meritojnë. Njëherit ishte një mesazh shumë i fuqishëm për instancat ndërkombëtare, se këtu luhet futboll dhe ne duhet të pranohemi”, pohoi Vokrri.
Me këtë ndeshje që zhvilluan sot dy vendet, Vokrri beson se mund të krijohen dy përfaqësuese, megjithëse duhet biseduar më gjatë rreth kësaj teme.
“Rezultati i ndeshjes ishte në plan të dytë, pasi më shumë kishte festë për tifozët. Sot, dëshmuam se mund ti bëjmë dy skuadra, por këtë duhet t’ia lëmë kohës, pasi duhet biseduar me Presidentin Duka lidhur për këtë qështje”, vazhdoi Vokrri.
Por, ajo që po e brengos seriozisht të parin e futbollit kosovar është infrastruktura e dobët që ekziston në vend.
“Infrastruktura është thembra e akilit në Kosovë. Besoj që qeveritarët e kanë kuptuar seriozitetin me të cilën duhen ti rreken në mënyrë qe ne mund ti plotësojmë kushtet për tu pranuar në UEFA. Ne jemi në proces e sipër, prandaj duhet punuar më shumë në këtë aspekt”, përfundoi Vokrri.
/tesheshi.com/
