Ashtu sikurse çdo e mirë e ka një të keqe, edhe tragjeditë kanë momentet e tyre të gëzimit e lumturisë dhe përveç se janë momentet në të cilat mësojmë se sa pak rëndësi kanë vlerat materiale dhe cila është rëndësia e vërtetë e jetës, nisim të mësojmë edhe shpresën e jetës.
Ky është rasti tipik dhe mësimi më i mirë që mund të nxjerrim nga tragjeditë e shumta që kanë ndodhur gjatë këtyre ditëve të fundit në zonën e Mesdheut, ku deri më tani, brenda pak ditëve, dy anije me pasagjerë në bord janë mbytur.
Ajo që shikoni në fotografinë e mësipërme është një vajzë, e cila është cilësuar si “vogëlushja e shpresës”, e cila ka arritur ti mbijetojë mbytjes së anijes në kanalin e Siçilisë, në Itali, vetëm tre ditë më parë.
E mbrojtur dhe në krahët e mjekëve, vajza gjendet në kushte shumë të mira shëndetësore.
Ajo mbërriti ditën e djeshme në brigjet italiane bashkë me 100 emigrantë të tjerë, mes së cilëve 28 fëmijë, pasi janë shpëtuar nga një anije mallrash ndërsa përpiqeshin të mbërrinin në breg.
Për fat të keq, ende nuk dihet asnjë gjë në lidhje me prindërit e vogëlushes dhe fatin e tyre.
Tragjedia e rëndë u shënua më 19 prill në det, në kanalin e Siçilisë në Itali. Një anije e mbushur me 700 emigrantë u fundos dhe nga të dhënat mësohet se anija ishte e mbushur mbi kapacitetin e lejuar të pasagjerëve.
Ishte një anije tregtare që ndodhej në det ajo që dha alarmin mbi fundosjen e anijes rreth 60 milje larg Libisë. Ekupiazhi i anijes tregtare pa gjithë tragjedinë, ndërsa arritën të shpëtonin 100 persona./tesheshi.com/
