Partia e Gruevskit e ka ashpërsuar gjuhën ndaj kryeministrit Edi Rama, një ditë pas intervistës së këtij të fundit në Politico, ku aludonte për një bashkim të mundshëm të Shqipërisë me Kosovën, gjithnjë nëse BE do e braktiste Ballkanin dhe nuk do ofronte garanci integrimi i sigurie.
Në një deklaratë të fundit ku sërish kërkon zgjedhje të parakohshme, VMRO gjen rastin që të sulmojë dhe shefin e ezkekutivit shqiptar, i shndërruar në armik për Shkupin zyrtar që pas pas paktit të arritur mes partive shqiptare në zyrën e tij, të cilën e ka pagëzuar si “Platforma Shqiptare”. Në sulmin ndaj Ramës, partia e Gruevskit nuk harron të fusë në punë dhe epitetin “soroist”
“Njeriu i cili qëndron pas Platformës së Tiranës vazhdon ta promovojë politikën sorosiste të shkaktimit të konflikteve me qëndrime edhe më të rrezikshme siç është ndryshimi i kufijve të Ballkanit, ndërsa LSDM-ja vazhdon me këmbëngulje të heshtë. Sa ka borxh dhe kujt i ka borxh udhëheqësia kriminogjene e LSDM-së është problem i tyre personal. Ai borxh nuk guxon dhe nuk do të paguhet për llogari të interesave më të larta shtetërore dhe kombëtare”, thuhet në deklartën e VMRO-së.
Ndërsa nga ana tjetër, LSDM vlerëson se dalja e vetme nga kriza politike është formimi i qeverisë së re nga shumica parlamentare.
“Shumica parlamentare prej 67 deputetëve të zgjedhur me mbi 700 mijë qytetarë, shumë shpejtë do të zgjedh kryetar të ri të Kuvendit, e më pas edhe qeveri të re, në pajtueshmëri me Kushtetutën, Rregulloren dhe Ligjet. Kjo është mënyra e vetme dhe demokratike nga kriza që e bën partia opozitare VMRO-DPMNE. Porosisim se institucionet janë të obliguar të mundësojnë transferim të qetë të pushtetit”, thuhet në një deklaratë të kësaj partie. /tesheshi.com/
