Vazhdojnë reagimet rutinore të VMRO-së në drejtim të siç e quajnë ata “Platformës së Tiranës”. Ata kanë reaguar edhe sot duke thënë se për çdo ditë po dalin fakte dhe argumente të përditshme se ajo është vepër e Edi Ramës e cila ka për qëllim të fusë Maqedoninë në krizë edhe më të thellë dhe ta ridefinojë sipas vizioneve të lojtarëve sorosoistë në Ballkan. Ata madje kanë akuzuar edhe liderin e LSDM-së si njeri i shantazhuar i cili i frikësohet burgut dhe që dëshiron me çdo kusht marrjen e pushtetit.
“Krimineli i abonuar Zoran Zaev është vetëm një njeri i shantazhuar, i cili i frikësohet burgut për të gjitha krimet që ka bërë. Ai është i gatshëm të pranoj të gjitha kërkesat që janë në kundërshtim me interesat më të larta të shtetit dhe nacionale”, thuhet në një deklaratë të VMRO-së.
Sipas kësaj partie, shumica e qytetarëve nuk kanë votuar për Platformë nga Tirana as për dygjuhësi, debate për himnin, flamurin e as për uniforma të reja, por për një Maqedoni unitare.
Pas kësaj vijoi reagimi i LSDM-së, ku thonë se gjendja e tillë në shtet nuk i sjell askujt mirë përpos një grupi të vogël të kriminelëve të udhëhequr nga Nikolla Gruevski, të cilët kanë frikë për lirinë e tyre dhe kjo, thonë ata, nuk guxon të jetë arsye për pengesë të shtetit.
“Të kishte çfarë t’u shpjegojë Nikolla Gruevski qytetarëve rreth asaj që e bën, nuk do të linte që deputetet e tij me replika absurde njëri-tjetrit të shkojnë në kundërshtim me dinjitetin e Kuvendit; e as që do t’i linte qytetarët të cilët i shqetëson me gënjeshtra që të kalojnë vetëm ditët në rrugë”, është thënë nga LSDM.
Edhe nga kjo parti Gruevski kërcënohet po ashtu me burg. /tesheshi.com/
