Pas 6 orëve debat në Kuvend, kaloi propozimi për emërimin e zëvendësministrave në qeverinë e re të Maqedonisë. Por kjo u pasua me reagim të ashpër nga deputetët e VMRO DPMNE-së, të cilët në kohën e votimit lëshuan seancën.
Me 62 vota për asnjë kundër dhe 5 abstenime deputetët votuan zv.ministrat e rinj. Kryeministri Zoran Zaev tha se ata do të punojnë në dobi të qytetarëve dhe në suaza të Kushtetutës dhe ligjeve.
“Atë që dua ta dinë të gjithë deputetët është se Kuvendi është ai që zgjedh dhe Kuvendi është ai që shkarkon. Unë sot propozojë kandidatë për të cilët jam i bindur se do të punojnë në pajtueshmëri me Kushtetutën dhe ligjin, që me dashuri dhe motivim të thellë do ta kryejnë funksionin e tyre, në një mënyrë të hapur dhe transparente para syve të të gjithë opinionit tonë dhe para syve të Kuvendit”, u shpreh Zaev.
Deputetët e Lëvizjes Besa abstenuan, me arsyetimin se nga zëvendësministrat e rinj nuk presin përmbushjen e reformave.
“Si Lëvizje Besa do të presim etablimin e qeverisë, dhe do të jemi të përmbajtur si pozicion politik”, tha Fadil Zendeli nga BESA.
Deputetët e VMRO-DPMNE-së kundërshtuan propozimet e në veçanti kandidimin e Arta Toçit për z/ministre të Punëve të Jashtme. Sipas tyre, ajo ka kundërshtuar emrin kushtetues të Maqedonisë dhe se është e qëndrimit se Maqedonia perëndimore i takon Shqipërisë. Propozimin e Arta Toçit deputetët e VMRO-së e quajtën skandaloz.
“Po flas për propozimin e kryetarit të Qeverisë që është skandaloze që ta propozojë për zëvendës ministër të punëve të jashtme, zonjën e cila vlerëson se Maqedonia perëndimore duhet t’i takoj Shqipërisë. Vlerësimi i tillë jo vetëm që është skandaloz por e rrit mosbesimin mes shqiptarëve dhe maqedonasve”, tha Antonio Milloshevski, nga VMRO-DPMNE.
BDI ka tashmë në qeverinë e Zaevit katër zv.ministra: Në polici Agim Nuhiun, në Mbrojtje Bekim Maksutin, në Financa Shirete Elezin, dhe në Arsim Visar Ganiun. Ndërsa Aleanca ka tre: Arta Toçi në diplomaci, Elmi Aziri në Punë dhe Politikë Sociale, si dhe Remzi Memeti në Transport dhe Lidhje. /tesheshi.com/
