Në Maqedoni, partia e Gruevskit vijon të denoncojë dygjuhësinë, si për të mbajtur të karikuar përkrahësit e saj kundër Zaevit dhe tentativës së tij për të formuar qeverinë, tashmë dhe me ndihmën ligjore të kreut shqiptar të Kuvendit, Talat Xhaferi.
Në një deklaratë të fundit të VMRO-së, kjo përmend pikërisht shqipen e Xhaferit në parlament, si shenjë se ç’mund t’i ndodhë Maqedonisë sipas saj, nëse zbatohet Platforma Shqiptare, të cilën ajo e quan si “të Tiranës”
“Qytetarët e Maqedonisë mund të shohin vetëm një segment të vogël se si do të funksionojnë institucionet pasi që LSD do të ndërmerr pushtetin- dygjuhësi e plotë në të gjitha segmentet e pushtetit në nivel lokal dhe qendror, bankënota dhe uniforma, debate për ndryshim të simboleve shtetërore, ndryshim të emrit si dhe faza finale e planit të Tiranës, federalizmi i Maqedonisë”, thuhet në deklaratë.
Është ky dhe një mesazh për Presidentin Ivanov, që ky i fundit të rezistojë dhe mos e japë mandatin e formimit të qeverisë me Zaevin në krye. Sakaq, VMRO i kujton këtij të fundit se do përgjigjet për veprat penale, që pretendihet se janë kryer prej tij në kushte të ushtrimit të detyrave të ndryshme shtetërore. /tesheshi.com/
