Policia ka mundur të vërë në pranga autorin e dytë një grabitjeje ditën për diell në zonën e Skelës në Vlorë, ku nën tyta armësh dhe me maska, i morrën shoferit dhe pasagjerëve, sasi të mëdha eurosh, të sapo ardhur nga Italia. Ngjarja ndodhi fiks një muaj më parë, në 25 shtator, para stadiumit të Vlorës.
Policia njofton se në orët e para të mëngjesit u kap Ylli Murati, 35 vjeç, banues në Tiranë.
“Ky shtetas është person i shpallur në kërkim nga D.V.P. Vlorë, pasi më datë 25.09.2018 në zonën e Skelës në bashkëpunim dhe me dy persona të tjerë kanë vjedhur nën kërcënimin e armëve të zjarrit shoferin dhe pasagjerët e autobusit të linjës “Itali-Vlorë”, sqaron policia.
Po atë ditë, pak orë pas ngjarjes, u arrestua Armand Kuqi, 29 vjeç, një prej tre grabitësve.
I treti nuk është kapur ende.
Ata i bënë pritë një furgoni të linjës Itali-Vlorë, ku nën kërcënimin e armës morën 19 mijë euro. /tesheshi.com/
