Nga Musa Mustafa
Ballë për ballë në muzeun e qytetit të Mitrovicës janë vendosur 103 telegrame të 103 viteve të Pavarësisë së Shqipërisë për karshi të 8 viteve të Pavarësisë së Kosovës.
E tërë kjo ndodh në ditën kur qytetarët e Kosovës po festojnë 8-vjetorin e Pavarësisë, ndërsa në Mitrovicë ka zbarkuar e tërë Vlora për të kremtuar së bashku këtë ditë.
“Këtu janë vendosur ballë për ballë 103 vite histori të Pavarësisë së Shqipërisë dhe 8 vite të Pavarësisë së Kosovës”, ka thënë para shumë qytetarëve të Mitrovicës kryebashkiaku i Vlorës Dritan Leli, në hapjen e ekspozitës së përbashkët të muzeut të Mitrovicës dhe atij të Pavarësisë së Shqipërisë në Vlorë.
“Këto 8 vite të historisë, Kosovës i kthejnë dinjitetin. 103 telegramet janë udhërrëfyese për 8 vitet e Pavarësisë së Kosovës pasi kemi bashkë edhe shumë punë për të bërë në rrugën tonë drejt Bashkimit Evropian”, ka thënë i pari i qytetit të Pavarësisë së Shqipërisë.
“Urën e Ibrit e vizitova, e pash se si ishte, por do ju them se ura shërbejnë për të bashkuar njerëzit e kulturat, urat sjellin zhvillim ekonomik dhe pas gjitha asaj që pash mora një lajm të mirë nga Kryetari i Komunës, Agmi Bahtiri se ura do të hapet në qershor të këtij viti”, ka thënë Leli, duke thënë më tej se shpreson se kjo urë me kaq tension së shpejti do të jetë urë që do të sjell stabilitet, bashkim e zhvillim ekonomik për Mitrovicën dhe qytetarët e saj.
Më tej ajo saktësoi se Mitrovica e Vlora kanë shumë të përbashkëta. “Isa Boletini është pjesë e Pavarësisë së Shqipërisë dhe këtij flamuri me shqiponjën dy krenare, andaj Vlora ka për obligim që gjithmonë të jetë në krah të Mitrovicës dhe Boletinit”, ka nënvizuar Leli.
Në anën tjetër, Kryetari i Komunës së Mitrovicës Agim Bahtiri, i ka rrëfyer të parit të Vlorës këmbëngulësinë e tij për t’i rivarrosur eshtrat e Isa Boletinit në Boletin e jo në Vlorë.
“Vlora do i kishte bërë nder të madh eshtrave të Isa Boletinit nëse do ishin varrosur për krah eshtrave të Ismaili Qemaljit, por specifikat e Mitrovicës dhe Boletinit, si dhe dëshira e madhe e qytetarët ishte që Isa të varroset në Kullën e tij në Boletin, nga ku u nis për në Vlore e për t’u kthyer prapë në Kullën e tij pas 100 vitesh”, ka arsyetuar Bahtiri.
Bahtiri ka njoftuar kryebashkiakun e Vlorës për problemet e mëdha që ka Mitrovica e sidomos me 12 mijë shqiptarë që janë të zhvendosur nga veriu në jug të Mitrovicës.
“Mitrovica, Boletini e Vlora do të jeni gjithmonë së bashku, pasi që edhe e kaluara e jonë dhe e të parëve tanë, na ka lidhur përjetësisht. Andaj, edhe sjellja e 103 telegrameve të shpalljes së Pavarësisë së Shqipërisë për nder të 8-vjetorit të Pavarësisë së Kosovës na ka nderuar”, ka thënë Bahtiri.
Në anën tjetër, drejtori i muzeut të Mitrovicës, Hajrullah Mustafa, si dhe homologu i tij, drejtori i Muzeut të Pavarësisë në Vlorë, Istref Dobi, kanë nënshkruar protokollin për binjakëzim e të dy muzeve.
Pas nënshkrimit të protokollit të binjakëzimit, të dy Kryetarët kanë bërë hapjen e ekspozitës “103 telegrame”, lidhur me shpalljen e Pavarësisë të Shqipërisë nga viti 1912 deri në vitin 1914.
Me këtë rast, Istref Dobi i ka njoftuar qytetarët me përmbajtjen e këtyre telegrameve duke theksuar se qeverisë së përkohshme të Ismail Qemalit i kanë arritur 399 telegrame, por që janë përzgjedhur që në Mitrovicë të ekspozohen 103 të tilla, e që shumica janë nga vendet përreth.
Por këtë festë e ka prishur paska një flamur kombëtar i shqyer, i vënë re në momentin që dy delegacionet po vendosnin kurora me lule pranë shtatores së Isa Boletinit. /tesheshi.com/
