Në Tiranë ka mbërritur një grup i madh gazetarësh nga vendet e Bashkimit Europian që i paraprijnë vizitës së shefes së diplomacisë së BE-së, Federica Mogherini, që të shtunën do të nisë axhendën e saj shqiptare.
Rezistenca që po i bëhet procesit të Vetingut është përkthyer si një refuzim i një vullneti politik të Bashkimit Europian për të pastruar Shqipërinë nga korrupsioni.
Komisioni Europian vetë ka dhënë mbi 100 milionë euro nga buxheti i tij, ndërkohë që vetëm Gjermania ka marrë përsipër që të mbulojë financiarisht pagesat dhe buxhetin e Prokurorisë Speciale, e cila thuajse i ka bërë gati zyrat dhe do të pajiset me infrastrukturë bashkohore për gjurmimin dhe hetimin.
Ndërkaq, një letër e Petrit Vasilit, ministrit të Drejtësisë së LSI-së ka sjellë sërish një pështjellim në vorbën e çorbës që po zien mbi Vetingun në Shqipëri.
Një burim diplomatik i tha tesheshi.com se beson që letra e Vasilit po bëhet si presion që Federica Mogherinit të zhvillojë një takim me kreun e Parlamentit Ilir Meta që nuk e ka në axhendë.
Madje mësohet se shefja e diplomacisë së BE-së nuk do të zhvillojë takime as me ministren e Integrimit Klajda Gjosha, që gjithashtu është e LSI-së dhe që edhe kjo e fundit ka dërguar një letër zyrtare në Bruksel ku e kundërshton Operacionin Ndërkombëtar të Monitorimit.
Sipas një axhende paraprake, zonja Mogherini do të takohet me Presidentin Bujar Nishani, Kryeministrin Edi Rama, kreun e opozitës Lulzim Basha dhe ambasadorët e SHBA dhe vendeve kryesore të BE-së në Tiranë.
Ministrja Gjosha do të jetë pjesë e delegacionit qeveritar me në krye Ramën në takimin me Mogherinti, por kjo ka shkaktuar një pakënaqësi duke pasur një përplasje të fortë mes saj dhe delegacionit të BE-së në Tiranë.
Në prag të vizitës së Mogherinit , 30 gazetarët që kanë mbërritur në Shqipëri nga vendet anëtare të BE-së pritet që të publikojnë në mediat e shteteve të tyre një seri shkrimesh në lidhje me pengimin e Vetingut nga një pjesë e politikës shqiptare.
Ndërkaq, zonja Mogherini, ndryshe nga hera e parë në vitin 2015 ku ju drejtua politikës shhqiptare për të votuar Reformën në Drejtësi, në një fjalim special Parlament, ku takoi edhe Ilir Metën, kësaj radhe nuk do të shkojë në legjislativ, ndaj kjo ka shkaktuar një pakënaqësi nga ana e kreu të Kuvendit, i cili siç duket këtë akt protokollar e ka marrë si një sinjal politik të Bashkimit Europian në lidhje me politikën shqiptare e specifikisht me të.
Nga ana tjetër, zonja Mogherini do të ketë një përpjekje për të bindur Lulzim Bashën që të kthehet në Kuvend duke ofruar një formulë kompromisi ndërmjet PS-së dhe PD-së. Por a do të jetë LSI pjesë e zgjidhjes? Deri tani duket që jo! /tesheshi.com/
