Njerku i Tatjanës nisi me gjëra të vogla. Fillimisht, ai mërzitej nga gjërat që bënte ajo. Ai e kritikonte dhe i mbante fjalime morali. Shpejt, leksionet ndaluan dhe nisi tërbimi. Dhe kur zemërimi mori fund, nisën goditjet. “Ai çmendej”, thotë Tatjana, emri i së cilës është ndryshuar për të mbrojtur identitetin e saj. “Për pesë vjet, ai më rrahu mua dhe nënën time, duke na lënë pa ndjenja”.
Historia e Tatjanës nuk është unike. Çdo vit, me dhjetëra mijë gra dhe fëmijë rusë përjetojnë dhunë në familjet e tyre – agresion, përdhunime e madje, edhe tentativë për vrasje. Vite pasi u arratis bashkë me nënën, Tatjana, tashmë 29 vjeçe, thotë se abuzimi brenda shtëpisë duhet të trajtohet e të dënohet përpara se të dalë jashtë kontrollit.
Por jo të gjithë pajtohen me të.
Deputetja ruse ultra-konservatore, Yelena Mizulina, e njohur më së shumti për paraqitjen e ligjit që ndalon propagandën gay, ka paraqitur tashmë një ligj të ri në Dumën shtetëtrore, ku propozon dekriminalizimin e dhunës në familje.
“Grindjet dhe sulmet ndaj pjesëtarëve të familjes duhet të jenë një krim administrativ”, thotë Mizulina, e cila kryeson edhe komitetine Dumës për familjen, gratë dhe fëmijët e që tashmë është edhe senatore në Këshillin e Federatës, apo dhomën e lartë të parlamentit rus. “Nuk duam që njerëzit të burgosen për dy vjet dhe të etiketohen kriminelë për gjithë pjesën tjetër të jetës, vetëm për një shpullë”.
E megjithatë, sipas statistikave zyrtare të qeverisë ruse, 40 për qind e të gjitha krimeve të dhunshme kryhen brenda familjes. Kjo llogaritet në 36 mijë raste të grave që sulmohen nga partnerët e tyre për çdo ditë dhe 26 mijë fëmjë që rrihen nga prindërit çdo vit.
Larisa Ponarina, zëvendësdrejtore e qendrës Ana, një organizatë që ndihmon viktimat e dhunës familjare sugjeron se më shumë se 14 mijë gra vdesin çdo vit si rezultat i abuzimit shtëpiak.
Ligji i propozuar nga Mizulina vjen pas amendimit të fundit të kodit penal, që u nënshkrua nga Vladimir Putin e që e deklaron dhunën në familje një krim penal që ndiqet nga shteti, në të njëjtën shkallë me krimet e huliganizmit dhe ato të urrejtjes. Këto ndryshime erdhën në fuqi në muajin korrik.
Mizulina, e mbështetur nga fushatues që mbrojnë vlerat tradicionale të familjes, po përpiqet të zhbëjë amendamentin. Kisha ortodokse ruse lëshoi një deklaratë ku thotë se nëse “është i arsyeshëm dhe jepet për shkak të dashurisë, ndëshkimi trupor është një e drejtë thelbësore që u është dhënë prindërve nga Zoti”
Një lëvizje për rezistencë të prindërve rusë paralajmëroi se kriminalizimi i dhunës në familje mund të sjellë procedimin e prindërve që veprojnë në interesin e mirë të fëmijëve të tyre.
Përpjekjet e mëparshme për të miratuar një ligj në lidhje me dhunën në familje kishin dështuar për dhjetë vjet.
Aktivistët thonë se vlerat arkaike janë bërë sërish popullore. Kombet e Bashkuara kritikuan të dhënat e Rusisë për të drejtat e grave duke rekomanduar miratimin e ligjeve të reja për dhunën në familje, ngritjen e qendrave të strehimit dhe dhënien e mbështetjes për gratë, viktima të dhunës.
Por, mbështetësit e fushatës për kriminalizimin e dhunës në familje thonë se kodi i ri penal nuk mbulon mjaftueshëm këto rekomandime. Rusia ishte një nga të paktat vende që ende nuk ka miratuar një ligj specifik për dhunën shtëpiake, e as ka nënshkruar konventën europiane për të drjetat e grave dhe dhunën në familje që hyri në fuqi në gusht 2014. Drafti i parë pas dhjetë vjetësh përpjekje, hartuar nga organizatat e të drejtave të njeriut, tashmë është gati për leximin e parë në parlament.
*Versioni origjinal i artikullit është botuar për herë të parë në gazetën “The Moscow Times”.
Përgatiti: Juli Prifti – /tesheshi.com/
