Siç duket, përfaqsuesja e Brukselit në Tiranë, Romana Vlahutin, ka qenë e pregatitur për sulmet ndaj saj, duke i lidhur ato vetëm me reformën në Drejtësi. Së fundi, në një takim me komunitetin e biznesit, ajo ka deklaruar se reforma do vijojë të hasë rezistencë dhe se fushatat intimiduese ndaj saj do jenë në rritje.
Komuniteti Ndërkombëtar ka qenë i përfshirë në shtyrjen përpara të reformës, por besojmë se ju, investitorët, gjithashtu duhet të shtoni zërin e mbështetjes. Çdo ditë nga sot do të hasim rezistencë ndaj këtij ndryshimi dhe fushatat intimiduese veçse do të rriten. E kemi të qartë këtë, por në muajt që vijnë është thelbësore të dëgjojmë zërin tuaj në favor të reformës për sundimin e ligjit, për të mbështetur investimet dhe rritjen”, ka thënë Vlahutin.
“Procesi i vettingut ka nisur zyrtarisht. Pra, po dëshmojmë hapat e parë konkretë të reformës në Drejtësi. Besoj se vettingu shkon përtej sistemit të drejtësisë. Një sistem gjyqësor i ndershëm, i pavarur dhe i përgjegjshëm nuk është thelbësor vetëm për demokracinë, por edhe për ekonominë e tregut”, ka thënë njeriu që përfaqson zërin e Brukselit në Shqipëri.
Ky reagim i saj, vjen në një kohë kur sërish është ngritur një pretendim, ai i ministrit të Drejtësisë, Petrit Vasili, i cili e quan antikushtetuese Organizatën e Monitorimit Ndërkombëtar, instancën kryesore që po i rri mbi kokë vettingut. Ndërkohë që dhe vetë sulmet ndaj znj. Vlahutin nuk rreshtin, pavarësisht mbrojtjes që i ka ardhur nga Bruskeli. Së fundi, ajo u shpotit dhe nga ish-eurodeputetja Doris Pack, historikisht e afërt me PD-në. /tesheshi.com/
