Vjosa Osmani do jetë përfundimisht gruaja që do drejtojë Kuvendin e Kosovës. E përzgjedhura si kandidate për kryeministre nga LDK në zgjedhjet e 6 tetorit,ajo do drejtojë tashmë jetën parlamentare.
Në një mesazh menjëherë pas zgjedhjes, ajo tha se me punën e sot do mund ta bënte me të denjë Kosovën për t’u jetuar.
“I falenderoj të gjithë deputetët për besimin që të udhëheqë Kuvendin e Republikës së Kosovës, tempullin e demokracisë ku përfaqësohet sovrani. Falenderoj Lidhjen Demokratike të Kosovës, partinë time të 20 viteve, për besimin dhe përkrahjen.
Uroj Qeverinë e Republikës së Kosovës, udhëhequr nga Kryeministri Albin Kurti dhe gjithë kabinetin qeveritar për
marrjen e detyrës dhe shpresoj që me punën e tyre do të na bëjnë të gjithëve krenarë. Do të punojmë fort dhe bashkë me njëri-tjetrin e me miqtë e Kosovës që ky vend, të jetë i denjë për të mos e braktisur kurrë.
Asnjëherë, të dashur qytetarë, nuk do të harrojmë se jemi aty për Ju e për secilën pëllëmbë të Kosovës. Secili prej nesh është mirënjohës ndaj jush dhe vullnetit Tuaj, deri në përulësi.
Nderimi ynë më i madh për të gjithë ata që sakrifikuan gjithçka për lirinë tonë, deri edhe jetën e tyre, do të jetë nëse me nder e përgjegjësi punojmë për të gjallët dhe nëse Kosovën e bëjmë vend me të cilin krenohen gjeneratat pas nesh”, tha Osmani.
Ajo dhe njëherë potencoi faktin se ka qenë e mbetet një rugoviane në politikë. “Gjithë jetën time në politikë e kam pasur një referencë: Dr. Ibrahim Rugova”, tha Osmani. /tesheshi.com/
