Vjosa Osmani, kandidate e LDK-së për kryeminsitre, tha se nëse do arrijë ta marrë detyrën e lartë qeverisëse pas zgjedhjeve të 6 tetorit, do jetë ajo që do e udhëheqë dialogun me Serbinë e jo presidenti Thaçi. Sipas saj, ky ka qenë dhe gabimi i rëndë i Haradinajt si kryeministër, duke ia lënë pra dialogin Thaçit.
“Është përgjegjësi kushtetuese e qeverisë që ta udhëheq dialogun. Ajo që ka ndodhur në mandatin e kaluar është një ikje nga përgjegjësia e Haradinajt, i cili çështjen esenciale të mbrojtjes së interesave shtetërore në raport me Serbinë ia la në duar një njeriu totalisht të papërgjegjshëm, pra Presidentit të vendit. Cilado që mund të ketë qenë arsyeja, nuk e arsyeton veprimin e tij. Ajo që do të ndodhë nga tani e në vazhdim, jo vetëm që do ta udhëheq unë dialogun Kosovë-Serbi, por do të ofrojë transparencë të plotë para parlamentit. Presidenti, jo vetëm që nuk do të ketë të drejtë të negociojë, por roli i tij do të jetë ceremonial, pasi në fund pas nënshkrimit të marrëveshjes nga ana ime si kryeministre, e tërë që i takon presidentit është një nënshkrim ceremonial”, tha Osmani në një intervistë për A2 CNN.
Sipas saj, Thaçi është i shantazhueshëm, dhe, edhe për këtë arsye, nuk mund ta udhëheqë Dialogun.
“Dialogu me Serbinë nuk është aspak i thjesht dhe unë këtë e kam të qartë sepse kam përvojë në këtë fushë. Unë mendoj se Kosova nuk duhet të përfaqësohet nga njerëz të shantazhueshëm, nga njerëz që mbi tavolinë negociojnë fatin e Kosovës, ndërsa nën tavolinë fatin e tyre politik. Unë besoj shumë në fuqinë e argumenteve. Ne duhet t’ia kthejmë dimensionin human dialogut. Do të kemi një qasje komplet ndryshe. Ndërkombëtarët duhet të kenë një partner me plan konkret dhe të besueshëm, pres që do të kemi rezultate”, tha Osmani. /tesheshi.com/
