Kryeministri i dorëhequr, Ramush Haradinaj, i cili po pretendon një mandat tjetër përmes koalicionit AAK-PSD, e ka quajtur “veprim të mençur” përzgjedhjen e Vjosa Osmanit si kandidate për kryeministre nga LDK-ja.
“E respektoj Vjosën, LDK-ja ka bërë një veprim shumë të mençur me nominimin e saj. Por krejt Kosova nuk është LDK, fatmirësisht jetojmë në demokraci”, ka thënë Haradinaj në një intervistë televizive.
Por Haradinaj kërkoi sqarim lidhur me qëndrimet e zonjës Osmani karshi taksës.
“Pres prej secilit kandidat që temat e interesit nacional të ruhen edhe në fushatë. Për shembull çështja e taksës duhet të sqarohet. Nëse ja jep tregun Serbisë, çka ofron për ta marrë njohjen”, ka thënë Haradinaj.
Ai u mundua t’i shmangë tonet maskiliste, duke thënë se problemet me të cilat përballet Kosova janë të rënda si për burrat ashtu edhe për gratë, dhe se nuk mendon se ndonjëra palë e ka më lehtë.
Ai ka thënë se do të ishte mirë që një grua të jetë kryeministre, por përtej këtij fakti, Haradinaj ka thënë se duhet të shikohet se çfarë agjende ka ajo si kandidate.
“Përballemi me tema të rënda. Me këtë nuk po them se këto rrethana nuk ja del një grua, sepse kemi parë që as burrat nuk kanë mundur të marrin vendime”, ka thënë ai.
Vjosa Osmani ishte befasia e djeshme e LDK-së për zgjedhjet e 6 tetorit. Nëse partia e saj arrin shumicën e votave për krijimin e qeverisë, ajo do të shërbejë si gruaja e parë me pozitën më të lartë ekzekutive. /tesheshi.com/
