Vjosa Osmani e nisi ditën e parë me “incidente” si kryetare e Kuvendit të Kosovës. Ajo hoqi foton e presidentit Thaçi, një kundërshtar politik për të, duke e zëvnëdësuar me atë të Rugovës, një figurë historike, e që Osmani e ka model në politikë, edhe nga fakti se i përket partisë ai themeloi.
Ky akt nuk është përjetuar mirë në Presidencë, ku siç raporton Klan Kosova, më e pakta e kanë trajtuar si shkelje protokollare.
‘’Presidenti i Republikës përfaqëson autoritetin më të lartë të shtetit dhe të gjitha institucionet obligohen me Ligjin për Protokollin e Shtetit që në mjediset e tyre ta vendosin fotografinë e Presidentit. Kuvendi është institucion ligjvënës i Republikës së Kosovës dhe si i tillë do të duhej të ishte shembulli më i mirë i zbatimit të ligjit.
Nuk e dimë nëse është e vërtetë ajo që është raportuar, por një veprim i tillë gjithsesi që do ishte shkelje e ligjeve në fuqi dhe një precedent i keq për të gjitha institucionet e Kosovës’’, është thënë nga Zyra e Shtypit e Thaçit.
Zëvëndësimi i Thaçit me Rugovën u vu re teksa Osmani priti ambasadorin amerikan në zyrën e saj. Kujtojmë që para Osmanit, Kuvendi drejtohej nga krahu i djathtë i Thaçit, ose ndryshe “hija politike” e tij, Kadri Veseli, njeriu që ai i la drejtimin e PDK-së pasi kaloi në Presidencë. /tesheshi.com/
