Policia e Shtetit prej disa ditësh ka nisur operacionin e koduar “Vjeshtë 2017” me synimin bllokimin e aseteve të krimit. Por në fokusin e kontrolleve të policisë janë edhe automjetet që konsiderohen luksoze, ndërsa në shumë qytete të vendit janë bllokuar për verifikim disa të tilla. Mes këtyre makinave janë bllokuar edhe mjete të blinduara.
Por operacionet e policisë duket se kanë tërhequr vëmendjen e ish-ministrit të Drejtësisë, Ylli Manjani, i cili sot është avokat.
Manjani ngre disa pyetje në lidhje me aksionin e policisë duke nisur që nga kriteri që përcakton nëse një makinë është apo jo luksoze dhe më tej me faktin se çfarë krim bën njeriu që ble dhe nget një makinë të tillë?
Operacioni i policisë synon pikërisht këtë, pra zbardhjen e faktit nëse makina është blerë apo trafikuar dhe nëse është e rrëgullt si janë siguruar të ardhurat.
Por Manjani thotë se policia shqiptare është e vetmja që mendon se zotërimi i një makine luksoze të bën kriminel, ndërkohë që krimin mund ta bëjë edhe dikush që nuk ka një automjet të tillë.
“Ore janë në terezi këta apo jo? Po pse more u dashka ndaluar njeru të përdorë makina luksoze?!
Cili ligj ndalon përdorimin e makinës luksose?! Ç’krim bën njeriu që blen dhe nget një makinë luksoze?!
Kush, përveç policisë Shqipëtare, thotë që të kesh një makinë luksoze, të bën automatikisht kriminel?!
Pse po të kesh një makinë “jo luksoze” nuk bën dot krim?!
Pastaj, çdo të thotë “luksoze”?! 4 rrota që drejtohen nga një timon e lëvizin nga një motor, çfarë quhet “luks” në një konstruksion të tillë, i destinuar për komsum!
Nuk e di! Po nëse synimi i policisë është të shndërrohet në Degë Ushtarake, apo postë kufitare (nga ato të dikurshmet), ku njerëzit duhet të paraqiten me detyrim aty, le ta thonë!
Ta thonë që të shkojmë vetë të gjithë nga një herë të paktën…
Se janë rreth 400 000 mjete të lëvizshme në vend që nuk ka vend as burgu për të gjithë!
Çfarë është vendi ku po jetojmë? Demokraci, Diktokraci a çfarë?
Qartësisht “luksi” na qenka diçka e keqe… natyrisht jo të gjithë ata që e kanë janë të këqinj…
Enver e shkuar Enverit….”, shkruan Manjani në një postim në rrjetet sociale. /tesheshi.com/
