Në vijim të operacionit “Vjeshtë 2017”, policia e Tiranës sekuestroi 8 makina luksoze, mbylli 2 lokale të kthyer në kazino dhe arrestoi një shtetas.
Shërbimet e Drejtorisë Vendore të policisë Tiranë, në zbatim të planit operacional “Vjeshtë 2017”, kanë vijuar kontrollet në qarkun Tiranë, ku si pasojë e kontrolleve të ushtruara, më datë 23.09.2017, u arrestua shtetasi : Kristaq Sinaj, 34 vjeç, banues në Tiranë, i dënuar më parë për veprën penale “Armbajtje pa leje”.
Ky shtetas përdorte lokalin e tij kazino për organizim të paligjshëm të lojërave të fatit dhe shitjes të lëndës narkotike të llojit kokainë.
Gjatë kontrollit të ushtruar në lokal kazinon (në pronësi të këtij shtetasi), në rrugën “Mikel Maruli” është gjetur dhe sekuestruar në cilësinë e provës materiale:
3 doza të dyshuara të lëndës narkotike të llojit kokainë të cilat rezultuan të peshës 1.4 gramë, 3 tavolina pokeri, 30 fisha për organizim lojërash fati dhe enë me mbetje lënde narkotike e dyshuar e llojit kokainë.
Gjithashtu proçedohet në gjendje të lirë shtetasi S.R, 23 vjeç, banues në Tiranë, pasi në lokalin e tij në rrugën “Mikel Maruli”, ushtronte aktivitet të kundraligjshëm të lojërave të fatit.
Gjatë kontrolleve të ushtruara janë bllokuar 7 mjete luksoze dhe 1 mjet i blinduar, të dyshuara të blera nga të ardhura të përfituara nga aktiviteti kriminal. /tesheshi.com/
