Më shumë se 60,000 austriakë u mblodhën të shtunën në Vienën qendrore, për të protestuar kundër qeverisë së re të krahut të djathtë. Organizatorët thanë se koalicioni i ri i Partisë Popullore (OVP) të kancelarit Sebastian Kurz dhe Partisë së Lirisë së Djathtë (FPO) të Heinz-Christian Strache ka tendenca raciste, ultranacionaliste dhe neofashiste.
“Vendin tonë nuk do ta drejtojnë këta fashistë të rinj”, po thërriste gjatë protestës Michael Genner nga Platforma për Politika të Azilit.
Protestuesit dolën në Sheshin e Heronjve të qytetit (Heldenplatz).
Policia austriake njoftoi se 20.000 vetë dolën në protesta, të cilat u konsideruan si të qeta dhe paqësore.
OVP e Kurz-it, i cili i përket qendrës së djathtë politike në qeveri, ka qenë në koalicion me Partinë Social Demokratike të qendrës së majtë për vite me radhë. Por tensionet midis dy partive çuan në një kolaps të bashkëpunimit vitin e kaluar.
FPO në anën tjetër ishte në qeveri nga viti 2000 deri më 2005 dhe atëherë shumë vende perëndimore ishin të shqetësuara për kthimin e kursit të Austrisë në të djathtë.
Tani reagimi ndërkombëtar duket i shurdhër, megjithëse austriakët e majtë kanë njoftuar se do të luftojnë qeverinë e re. /tesheshi.com/
