Mbërrin nga Greqia urdhër-arresti për Klement Balilin.
Dokumentacioni i plotë nga shteti fqinj mbërriti bashkë me kërkesën për arrestim të atij që media e ka quajtur si “Escobari i Ballkanit”.
Megjithatë, policia nuk do ta ketë fare të vështirë ta ekzekutojë urdhër-arrestin. “Keli” ndodhet shumë pranë banesës së tij, dhe këtë e di jo vetëm policia, por edhe forca të tjera shtesë që ndodhen në këtë zonë prej një muaji.
Por nuk përjashtohet mundësia e largimit me dokumente të falsifikuara, ose në rrugë ilegale, duke përdorur një itinerar tokësor a detar. Apo, troç e shkurt, ai të jetë penduar dhe të ketë pranuar që të bëhet dëshmitar i drejtësisë amerikane, që po e heton gjithë këtë dosje.
Policia, më herët, përpara se të vinte ky urdhër-arresti, bënte me dije se e kishte nën kontroll situatën dhe se priste vetëm fletën e arrestit për të vepruar.
Ministri i Brendshëm, Saimir Tahiri, tha të hënën në Top Story se arrestimi i tij ishte çështje orësh, dhe se pritej vetëm kërkesa zyrtare nga Greqia.
Deri më tani janë arrestuar 17 pjesëtarë të këtij rrjeti, 11 grekë dhe 6 shqiptarë. Arrestimet u kryen në Greqi dhe Belgjikë. /tesheshi.com/
