Kreu i Selisë së Shenjtë i përshkroi me fjalën “gjenocid” ngjarjet e vitit 1915 gjatë vizitës së tij në Armeni, duke sjellë dhe reagimin e ashpër të zyrtarëve turq.
Ka qenë zëvendëskryeministri turk, Nurettin Canikli, që ka përcjellë haptas zemërimin për komentet e Papës.
Duke folur para gazetarëve në një aktivitet, ai ka thënë: “Para së gjithash, është për të ardhur keq që Papa bëri komente të tilla. Fatkeqësisht, … aktivtetet e Papës dhe të papatit bartin gjurmët dhe reflektimet e mendësisë së kryqtarit. E njëjta gjë vlen për komentet e Papës.”
Duke thënë se e vërteta mbi ngjarjet e fillimshekullit të shkuar, mbi të ashtuajturin “gjenocid”, është e njohur nga të gjithë, edhe nga vetë armenët, zëvendëskryeministri turk ka shtuar në lidhje me përshkrimin e Papës: “Nuk është një koment i paanshëm. Nuk ka lidhje me realitetin.”
Turqia e shtetarët e saj janë tepër të ndjeshëm në lidhje me trajtimin që u bëhet ngjarjeve të vitit 1915. Ndërsa pranohet fakti se ka patur viktima armene, e këto ngjarje përshkruhen si tragjedi, për Turqinë është i papranueshëm përdorimi i i termit “gjenocid.”
Prej kohësh është bërë thirrje fort nga zyrtarët turq, posaçërisht nga presidenti Erdogan, për ngritjen e një komisioni të përbashkët historianësh turko-armen për analizimin shkencor e akademik të atyre ngjarjeve. Kjo thirrje nuk ka gjetur përgjigje gjer më tani. /tesheshi.com/
