Pas shumë premtimeve kryesisht në sferën e ekonomisë, në ditën e gashtë të fushatës zgjedhore ka ardhur edhe premtimi për bashkimin e Mitrovicës. Këtë premtim e ka bërë Lëvizja Vetëvendosje në tubimin që ka mbajtur sot në këtë qytet.
“Trepça nuk është vetëm krenaria për të kaluarën por edhe shansi ynë i të ardhmes. Nuk mund të flasësh për Mitrovicën pa e menduar zhvillimin e Trepçës dhe nuk mund të flasësh për zhvillimin e Trepçës pa bashkimin e Mitrovicës. Vetëvendosje i ka në plan t’i bëjë të dyja”, tha Kurti para mitrovicasve, ndërsa premtoi se nëse vije në pushtet në katër vitet e qeverisjes do të ndajë 300 milionë euro për Trepçën.
Edhe kryetari i VV-së, Visar Ymeri, ka garantuar se partia që ai drejton do të bashkojë qytetin e ndarë.
“Vetëvendosje ka në program bashkimin e Mitrovicës dhe forcimin e sovranitetit. Ky proces do të shoqërohet me dialogun lokal me pakicat serbe, ndalimin përgjithmonë të ‘Zajednicës’, shuarjen e strukturave paralele dhe reciprocitetin me Serbinë”, tha Ymeri, por pa treguar se kur parashohin të kryhet ky proces. /tesheshi.com/
