Ndërkohë që autoritetet në rivierën franceze nuk i ishin bindur një vendimi të gjykatës më të lartë administrative, një gjykatë e Nisës e ka hequr më në fund ndalimin e burkinit, bën me dije AFP-ja.
Vendimi i sotëm pason pikërisht atë të gjykatës administrative një javë më parë për pezullimin e ndalimit të burkinit nga rreth 30 qytete e qyteza përgjithësisht në juglindje të Francës.
Gjykatësit në Nisë u shprehën se sulmi i 14 korrikut nuk ishte një argument i mjaftueshëm për ta përligjur ndalimin e burkinit.
Nisa ishte një nga qytetet e para frannceze që do ta ndalonte burkinin këtë verë, me zyrtarët vendorë që e justifikuan veprimin me vënien në rrezik të rendit publik nga një veshje e tillë.
“Në mungesë të rreziqeve të tilla, emocionet dhe shqetësimet që vijnë nga sulmet terroriste, e veçanërisht nga sulmi më 14 korrik, janë arsye të pamjaftueshme për ta përligjur ligjërisht ndalimin e kundërshtuar,” do të shprehej gjykata administrative e qytetit të enjten.
Çështja e burkinit ka mbizotëruar prej javësh në debatin politik e ndryshe në Francë e më gjerë. /tesheshi.com/
