Ish-sulmuesi i Bregut të Fildishtë dhe i Chelsea-t, Didier Drogba, 42 vjeç, është fituesi i këtij viti i Çmimit Presidencial që Shoqata Evropiane e Futbollit (UEFA) u jep ish-të mëdhenjve të futbollit çdo vit.
Presidenti i UEFA-s Aleksandar Ceferin do të japë çmimin në shortin e grupeve të Ligës së Kampionëve të enjten, dhe në të njëjtën ditë UEFA do të shpallë edhe Futbollistin Evropian të Vitit.
“Didier Drogba është një udhëheqës dhe një pionier. Mbaj mend aftësitë, forcën dhe inteligjencën e tij në fushën e futbollit, dhe mbi të gjitha kujtoj urinë e tij të pangopur për sukses. Ai ishte jo vetëm një futbollist i shquar, por edhe një njeri i shquar”, tha Ceferin.
Drogba la gjurmë të thella në futbollin evropian, veçanërisht në kohën kur ai luante për Chelsea-n. Me fanellën e ekipit londinez, ai fitoi gjithsej 11 trofe, përfshirë Ligën e Kampionëve dhe katër tituj anglezë.
Ai gjithashtu ka luajtur për klubet franceze Le Mans, Guingamp, Marseille dhe Galatasaray, si dhe nga një sezon për Shanghai Shenhua (Kinë), Montreal (Kanada) dhe Phoenix Rising (SHBA). Ai bëri 105 paraqitje për ekipin kombëtar të Bregut të Fildishtë dhe shënoi 65 gola.
“Fitimi i Ligës së Kampionëve si dhe loja dhe shënimi i golave për ekipin tim kombëtar në Kupën e Botës, janë gjërat që mund t’i kisha ëndërruar kur isha fëmijë,” tha Drogba, duke shtuar:
“Ka kaq shumë fëmijë në botën në zhvillim që mund të bëhen jo vetëm futbollistë, por edhe mjekë, mësues dhe inxhinierë. Kjo është arsyeja pse është kaq e rëndësishme të ndihmojmë dhe mbështesim fëmijët tanë për t’u bërë të mundur përmbushjen e ëndrrave të tyre.”
UEFA po e jep këtë çmim që nga viti 1998, dhe deri më tani i është dhënë Jacques Delors, Guy Roux-it, Juan Santisteban-it, Bobby Robson-it, Paolo Maldinit, Ernie Walker-it, Frank Rijkaard-it Ëilfried Straub-it, Alfredo Di Stefano-s, Bobby Charlton-it, Eusebios, Raymond Kopa-s, Gianni Rivera-s, Franz Beckenbauer-it, Johan Cruyff-it, Josef Masopust-it, Francesco Totti-t, David Beckham-it dhe Eric Cantona-s. /tesheshi.com/
