Ka mbërritur mbrojtja e parë ndërkombëtare për ministrin në ditë të vështira, Fatmir Xhafaj.
I akuzuar nga opozita edhe për falsifikim ligji, sipas saj për të mbrojtur nga ekstradimi të vëllanë, pikërisht në këtë pikë ka ardhur ndihma për të nga Brukseli.
Delegacioni i Bashkimit Europian në Shqipëri që ka reaguar për VOA-n, duke thënë se paketa e reformës në drejtësi është asistuar nga misioni EURALIUS.
“Ka patur variante të ndryshme rreth Nenit 491 (f) të Kodit të Procedurës Penale, që janë diskutuar nga Grupi i Punës për Rishikimin e Kodit të Procedurës Penale – pjesë e të cilit ka qenë edhe Euralius – deri në miratimin e ndryshimeve të Kodit më 30 mars 2017. Thelbi i varianteve të ndryshme mbeti i pandryshuar gjatë gjithë diskutimeve, përfshirë dhe variantin përfundimtar të miratuar të Nenit 491 (f) të Kodit”.
Më tej, Delegacioni i BE-së në Tiranë, e që kryesohet nga ambasadorja Romana Vlahutin. theksoi në deklaratën e tij se “Neni 491 (f) i miratuar i Kodit, garanton se personi i cili është gjykuar dhe dënuar në mungesë ka mundësinë që të ketë një rishqyrtim të çështjes në prani të tij/saj përpara Gjykatës. Kjo masë është në përputhje me Standartet europiane të përcaktuara nga Gjykata Europiane e të Drejtave të Njeriut, Konventa Europiane për Ekstradimin dhe Vendimi kuadër i BE-së për Urdhër-arrestin europian. Shqipëria ka ratifikuar gjithashtu Konventën Europiane mbi Transferimin e Procedimit të Çështjeve Penale, një tjetër alternativë për ekstradimin, për rastet kur zbatohet Neni 491 (f) i Kodit”, thuhet në deklaratë. /tesheshi.com/
