Pak pas mesnate, në nisje të së premtes, Brazili dhe Argjentina do të ndeshen në Belo Horizonte për kualifikueset e botërorit Rusi 2018.
Klasikja e futbollit botëror ka për të nisur në 00:45 me orën europiane. Ajo është një prej pesë takimeve të javës së njëmbëdhjetë të eliminatoreve në grupin amerikanolatin.
Brazili vjen në këtë ndeshje në pozitën e kryesuesit, me 21 pikë mes dhjetë përfaqësueseve, ndryshe Argjentinës, që renditet e gjashta, me pesë pikë më pak.
Për Argjentinën është një takim nga ku duhet të dilet patjetër me pikë, për vetë pozitën në klasifikim. Nuk duhet harruar gjithashtu që Argjentinën e pret një përballje tjetër e vështirë, ndaj Kolumbisë, në ditën e dytë të javës së ardhshme.
Lënia në stol e Aguero-s pritet të jetë surpriza e mbrëmjes, pasi mendohet që tek Argjentina ta përbëjnë linjën e sulmit në këtë ndeshje Messi e Higuain.
Takimi, sipas FIFA-s, do të jetë i 102-ti midis gjigandëve të futbollit botëror, me brazilianët që udhëheqin me 39 fitore karshi 37 të argjentinasve. /tesheshi.com/
