Një operacion gjigand italo-shqiptar ka çuar në goditjen e një rrjeti të madh të trafikut të drogës, me bilanc 37 të arrestuar në këndej e tej detit, si dhe 40 milion euro drogë të sekuestruara.
Drejtuesit e Anti-Mafies italiane dhe pala shqiptare, kreu i SPAK-ut Arben Kraja dhe prokurori Vladimir Mara që udhëtuan drejt Romës, zhvilluan një konferencë për mediat lidhur me super operacionin që çoi 37 persona në pranga për 40 milionë euro drogë të sekuestruar.
Prokurori i Antimafias italiane Federico Cafiero De Raho, tha se suksesi i operacionit ishte bashkëpunimi mes dy vendeve për të goditur grupet kriminale me skuadra invetigative. “37 të arrestuar, një operacion i madh pas bashkëpunimit mes Shqipërisë dhe Italisë me një skuadër investigative. Janë sekuestruar tonelata marijuanë dhe kokainë. Bashkëpunimi mes vendeve është arma më e fortë të luftuar trafikun e drogës mes vendeve. Është operacioni më i madh që ka goditur grupet kriminale italiane dhe shqiptare i zhvilluar ndonjëherë“, tha ai.
Nga ana tjetër, kreu i SPAK-ut bëri një premtim: “Në Shqipëri do të hetojmë përgjegjësinë e autoriteteve shtetërore që kanë lejuar apo favorizuar aktivitetin kriminal. Kushdo që të jetë i përfshirë dhe do të provohet do të dërgohet para gjyqit”, tha Kraja. /tesheshi.com/
