Një paraqitje katastrofike ka qenë ajo e Turqisë këtë mbrëmje, mbase më e keqja e një përfaqësueseje në këtë Europian.
Spanja ka fituar 3-0 ndaj Turqisë, në një ndeshje ku mund të shënonte akoma nëse do të dëshironte të bënte kështu.
Spanjollët kanë bërë gjithçka, kanë zotëruar topin, e kanë qarkulluar atë, kanë rrezikuar e kanë shënuar, duke mos ngjarë aspak me atë ekip të para dy viteve në Brazil. Mund të thuhet pa frikë sonte se Spanja është ekipi më i kompletuar në këtë Europian, e më pretenduesi për ta fituar atë.
Alvaro Morata ka shënuar dy herë, e një herë e ka çuar topin në rrjetë dhe Nolito. Iniesta përsëri e ka shfaqur talentin e tij të padiskutueshëm, e De Gea as është ngacmuar fare në portë.
Me gjashtë pikë pas dy ndeshjesh, Spanja është kualifikuar për në turin tjetër, me sytë drejt finales.
Turqia, në anën tjetër, nuk ka dhënë asgjë. Një formacion i pafrymëzuar, pa ide, pa qartësi, pa mbrojtje, pa mesfushë, pa sulm. Arda Turan nuk ngjan aspak me atë që jemi mësuar të shohim në kampionatin spanjoll, Hakan Çalhanoğlu nuk është ai i Bundesligës, Caner Erkin sapo është transferuar te Interi në Itali, por nuk tregon asgjë në fushë. Dhe, në fund, Fatih Terim që shfryn në stol. Turqia është dorëzuar.
Humbja e dytë në dy takime, e për më tepër, duke lënë përshtypje aspak pozitive. Matematika e mban në lojë, por loja e turqve është për të ardhur keq.
E tëra shoqërohet nga një absurd. Tifozët turq nisin e fishkëllejnë lojtarët e tyre. Arda Turan është objektivi kryesor. Dhe komentatori turk detyrohet të rebelohet kundër tifozëve, u del në krah lojtarëve, e bën thirrje për përmbajtje.
Spanja i gëzohet kështu kualifikimit pa telashe, kurse Turqia është pranë kthimit nga ka ardhur. /tesheshi.com/
